झापा । झापा स्थित भद्रपुर कारागारमा एकै दिन दुई जना कैदीको मृत्यु भएको छ ।

जबरजस्ती करणी मुद्दामा पक्राउ परेका नगरपालिका ६ बस्ने ५० वर्षीय अनुरञ्जन घोष र करणी मुद्दामै पक्राउ परेका कचनकवल गाउँपालिका ७ बस्ने ३२ वर्षीय किशनलाल राजवंशीको मृत्यु भएको कारागार प्रमुख राजेन्द्र निरौलाले जानकारी दिए।

फोक्सोमा पानी जमेर मेची अञ्चल अस्पताल भद्रपुरको आइसियुमा उपचाररत घोषको मङ्गलवार दिउँसो मृत्यु भएको हो। उनलाई २०७१ साल मङ्सिर २२ गतेदेखि जबरजस्ती करणी मुद्दामा १३ वर्ष सजाय तोकिएको थियो ।

त्यसै गरी मृत्यु हुने अर्का व्यक्ति भने मिर्गौलाका बिरामी रहेका थिए । उनी मङ्गलबार बिहान कारागार भित्रै बेहोस भएर लडेका थिए। उनलाई मेची अस्पताल पुर्‍याए लगत्तै उनको मृत्यु भएको हो। उनलाई गत असोजमा जबरजस्ती करणीमा तीन वर्षको सजाय तोकिएको थियो ।