काठमाडौं :  परीक्षण सुरक्षा जोखिमलाई मध्यनजर गरेर कोरोना भाइरस संक्रमितको उपचारमा प्रयोग गर्न सकिने बताइएको मलेरियाको औषधि हाइड्रोक्सिक्लोरोक्वीन बन्द गरिएको विश्व स्वास्थ्य संगठन (डब्लुएचओ) ले जनाएको छ ।

सावधानी स्वरुप विश्वका विभिन्न देशमा भइरहेको परीक्षण अस्थायी रुपमा बन्द गरिएको डब्लुएचओले जानकारी दिएको हो । हाइड्रोक्सिक्लोरोक्वीन मलेरियासहित लुपस र आर्थाइटिसमा प्रभावकारी हुन्छ । तर कोरोना भाइरसको संक्रमण भएका बिरामीका लागि यो उपयुक्त हुने प्रमाण अझै फेला नपरेको डब्लुएचकोले बताएको छ । 

डब्लुएचओ अधिकारीहरुले स्वास्थ्यमा गम्भीर असर पर्न सक्ने देखिएकाले सावधानी स्वरुप हाइड्रोक्सिक्लोरोक्वीनलाई सम्भावित औषधिको परीक्षण सूचीबाट हटाइएको पनि बताएका छन् । अमेरिकी राष्ट्रपति डोनाल्ड ट्रम्पले लगातार यो औषधि कोरोना भाइरसको उपचारमा प्रयोग हुने बताउँदै आएका छन् ।

उनी आफैंले कोरोना भाइरसको संक्रमणबाट जोगिनका लागि हाइड्रोक्सिक्लोरोक्वीन खाएको पनि बताएका थिए ।