काठमाडौँ । शनिवार स्वास्थ्य तथा जनसङ्ख्या मन्त्रालयद्धारा पुष्टि भएका ३६ कोरोना सङ्क्रमित मध्य एक हुन झापाका ३३ वर्षीय पुरुष ।

उनी गत जेठ ४ गते भारतको मुम्बईबाट स्वदेश भित्रिएका थिए । कोसी अस्पतालको प्रयोगशालामा गरिएको परीक्षणमा उनको कोरोना भेटिएको थियो ।

झापा गाउँपालिकाको डिल्लीराज मावि क्वारेन्टिनमा बसेका उनमा कसरी कोरोना सर्‍यो भन्ने यकिन नभए पनि भारतबाट नै उनी सङ्क्रमित भएर नेपाल फर्किएको हुन सक्ने अनुमान गरिएको छ ।

गाउँपालिका अध्यक्ष जयनारायण शाहका अनुसार उक्त क्वारेन्टिनमा दुई दिन अघि स्वाब सङ्कलन गरिएको थियो। जसमा १२ जनाको परीक्षण गर्दा उनमा मात्र कोरोना पुष्टि भएको हो ।।

शाहका अनुसार सङ्क्रमितसँगै भारतबाट सँगै आएका र क्वारेन्टिनमा एउटै कोठामा बसेका अरू दुई जनाको रिपोर्ट पनि नेगेटिभ रहेको छ ।