काठमाडौं । अछामको तुर्माखाँद गाउँपालिकाको एक वडामा प्रहरीले सर्वसाधारणमाथि हमला गरेको छ । गाउँपालिकाको वडा नं ६ स्थित रानीवनमा प्रहरीले त्यहाँका केही स्थानीय वासिन्दा माथि ढुङगा/मुढा प्रहार गरेको त्यहाँका स्थानीयले बताएका छन । उनीहरुका अनुसार यो घटना जेठ ८ गते बिहीबार भएको हो । प्रहरीले स्थानीयमाथि यस्तो हमला गर्नुको कारण जिल्लाबाहिरबाट आएका एकजना व्यक्तिलाई क्वारेन्टाइनमा राख्ने या नराख्ने भन्ने विषय रहेको थियो जसमा स्थानीयले ती व्यक्तिलाई क्वारेन्टाइनमा राख्न माग गरेका थिए ।

उक्त व्यक्ति कैलाली जिल्लामा निरन्तर बस्दै आइरहेका थिए तर दुइ दिन सुर्खेतको बसाइपछि मात्र उनी त्यहाँ पुगेका थिए । कैलाली त्यस्तो क्षेत्र हो जहाँ कोरोनाको अत्याधिक जोखिम छ । पछिल्लो समय त्यहाँ ७ जना संक्रमित फेला परिसकेका छन । यस्तो जोखिमपूर्ण ठाउँबाट आएको मान्छेलाई क्वारेन्टाइनमा राखौँ भन्ने माग राख्दा उनीहरुमाथि निर्घात कुटपिट भएको छ । यस विषयमा त्यहाका जनप्रतिनिधिले कुनै चासो नदिएको र सुरक्षाको जिम्मेवारी लिएको नेपाल प्रहरीले यस्तो व्यवहार गरेको बताइएको छ । प्रहरीको लाठी चार्जबाट अधिकांशलाई चोट लागेको छ, तीमध्ये कोही घाइते पनि भएका छन । रानीवनमा अवस्थित भैरवस्थान प्रहरी चौकीमा कार्यरत प्रहरीले स्थानीय जनतामाथि यस्तो व्यवहार गरेको पीडित दिपक राज न्यौपानेले राजधानी डट न्युजलाई बताए । उनले भने – “कोरोनाको जोखिम बढिरहेका बेला गाउँमा कुनै नयाँ मान्छे प्रवेश गर्दा तिनलाई क्वारेन्टाइनमा राख्नुपर्छ भनेर हामीले माग गर्दा उल्टै प्रहरी हामीहरुमाथि नै जाइलाग्यो ।” स्थानीयहरुका अनुसार त्यहाँका जनप्रतिनिधिहरुले नै प्रहरीलाई यस्तो व्यवहार गर्न लगाएको आरोप लगाएका छन । आफ्नो काम गर्दै गरेका स्थानीयलाई प्रहरीले यसरी किन लाठी चार्ज र ढुङगा/मुढा गर्यो भन्नेमा उनीहरु आश्वस्त हुन सकेका छैनन ।

यस विषयमा छलफल गर्ने भनिए पनि सम्बन्धित व्यक्तिहरुबाट बेवास्ता भैरहेको छ । छलफलका लागि उनीहरुले त्यहाँका वडा अध्यक्षलाई गुहारे पनि उनले कुनै चासो देखाएका छैनन । हामीले यस विषयमा सत्य, तथ्य बुझ्न गाउँपालिका अध्यक्ष, उपाध्यक्ष, त्यहाँका वडा अध्यक्ष र प्रहरी चौकीमा सम्पर्क गर्ने प्रयास गर्यौ तर कसैसँग पनि हाम्रो सम्पर्क हुन सकेन । तुर्माखाँद गाउँपालिका वडा नं. ६ का अध्यक्ष मुक्तिनाथ उपाध्यायको संलग्नतामा नै प्रहरीले आफूहरुमाथि यस्तो व्यवहार गरेको स्थानीयहरुले आरोप लगाएका छन । उनीहरुले यस विषयमा लेखिदिनका लागि त्यहाँको एक स्थानीय रेडियोलाई भनिएको तर उनीहरुले अध्यक्षको अनुमति बिना कुनै सामग्री प्रचार÷प्रसार गर्न नहुने बताएको उनीहरुको गुनासो छ । वडा अध्यक्ष उपाध्यायले पीडित स्थानीयहरुलाई यस विषयमा मुद्दा हाल्न सुझाएका छन तर कहाँ गएर मुद्दा हाल्ने भन्ने उनीहरुलाई जानकारी नै छैन ।

प्रहरीले उनीहरुलाई लाठी चार्ज मात्रै गरेन अनेक अपशब्द बोल्दै उनीहरुलाई लखेटेको पनि छ । रातिको करिब ८ बजेतिर प्रहरीले स्थानीयहरु माथि यस्तो व्यवहार गरेको बताइएको छ । आफूहरुले कुनै गलत काम नगरेको र आफूहरुमाथि यस्तो हर्कत गर्ने प्रहरी लगायत संलग्न सबैलाई कारवाही गरी न्यायको अनुभूति दिलाउन पीडित न्यौपानेले माग गरेका छन ।