काठमाडौं । नेपालगञ्जमा आज एकैदिन २१ जना कोरोना संक्रमणलाई जितेर घर फर्किएका छन । नेपालगञ्ज उपमहानगरपालिका–ं७ का पहिलो सङ्क्रमित ६० वर्षीय पुरुषसहित नेपालगञ्ज–८ जोलाहनपुरका २० जना गरी २१ जना कोरोना भाइरसलाई जितेर घर फर्किएका हुन ।

खजुरास्थित सुशील कोइराला प्रखर क्यान्सर अस्पतालमा प्रदेश सरकरले स्थापना गरेको कोरोना विशेष आइसोलेशन अस्पतालमा उपचार गराईरहेका उनीहरूमध्ये पहिलो सङ्क्रमितको तेस्रो पटकको परीक्षणमा मात्रै नेगेटिभ रिपोर्ट आएको भेरी अस्पताल नेपालगञ्जका मेडिकल सुपरिटेण्डेण्ट डा प्रकाश थापाले बताए ।

संक्रमितमध्ये एक जनाको दोस्रो परीक्षण रिपोर्ट नेगेटिभ आएको र अन्य २० जनाको रिपोर्ट दोस्रो पटक पनि पोजेटिभ आएको र तेस्रो पटक परीक्षण गर्दा उनीहरुमा नेगेटिभ रिपोर्ट देखिएको थियो । अस्पतालबाट डिस्चार्ज भएका उनीहरुलाई घर पठाइएको छ ।

सुशील कोइराला अस्पताल खजुराको कोरोना विशेष अस्पतालमा उनीहरूलगायत २५ जना संक्रमितलाई राखी उपचार भइरहेको थियो । अन्य चार जनाको समयावधि नपुगेको हुँदा दोस्रो परीक्षण नगरिएको स्वास्थ्य कार्यालय बाँकेका कोरोना फोकल पर्सन नरेश श्रेष्ठले जानकारी दिए ।

तीन दिनअघि दोस्रो तथा तेस्रो परीक्षणका लागि स्वाब सङ्कलन गरी भेरी अस्पतालको प्रयोगशालामा दुई पटकसम्म गरिएको परीक्षणमा पनि २१ जनाको रिपोर्ट नेगेटिभ आएको उनको भनाइ छ । नेपालगञ्जमा गत वैशाख १९ गते पहिलो सङ्क्रमण पुष्टि भएको थियो । हाल सङ्क्रमित १०१ पुगेका छन् ।

यो सँगै नेपालमा कोरोना संक्रमणलाई जितेर घर फर्किनेहरुको संख्या ७० पुगेको छ भने अन्य संक्रमितहरुको देशका विभिन्न अस्पतालहरुमा उपचार भैरहेको छ ।