काठमाडौं । कोरोना भाइरसको महामारीबाट बच्नका लागि सरकारले लकडाउनलाई निरन्तरता दिइरहेको छ । तर पछिल्लो समय सरकारले गरेको लकडाउन त्यति प्रभावकारी रुपमा कार्यान्वयन भएको देखिदैन । त्यति मात्रै होइन काठमाडौं उपत्यकामा त झनै लकडाउन उल्लंघन भैरहेका गुनासाहरु आउन थालेका छन । मन्त्रिपरिषदको बैठकमा समेत प्रधानमन्त्रीले लकडाउन खुकुलो बनाईएको भन्दै उपप्रधान एवम् रक्षामन्त्री ईश्वर पोखरेलसँग गुनासो गरेका थिए ।

कोरोना संक्रमितहरुको संख्यामा पछिल्लो समय वृद्धि भैरहेको अवस्था छ । काठमाडौं उपत्यकाको लकडाउन नागरिकले पूर्ण रुपमा पालना नगरेको सरकारको निष्कर्ष छ । अब सरकारले काठमाडौं उपत्यकाको लकडाउनलाई विशेष रुपमा लागू गर्ने तयारीमा जुटेको स्रोतले जनाएको छ । सरकारले अब चाल्ने कदम काठमाडौं उपत्यकामा कर्फ्यु र स्वास्थ्य संकट घोषणा गर्नेसम्मको हुने स्रोतको दाबी छ ।

लकडाउन कडाईका साथ कार्यान्वयन गराउनेगरि अझै केही दिनसम्म सरकार पर्ख र हेरको रणनीतिमा छ । तर, लकडाउन कडाई गर्दापनि केही नलागे काठमाडौंमा निषेधाज्ञा जारी गर्नपनि पछि नहट्ने जिल्ला प्रशासन कार्यालय, काठमाडौंको रणनीति छ । जुन कुरा काठमाडौंका सिडिओले सुरक्षासम्बन्धी बैठकमा राख्दै आएको पनि स्रोतको दाबी छ ।

कोरोनाको संक्रमण बढिरहँदा भने नेपालमा लकडाउनको अवज्ञा भैरहेको कतिपयको गुनासो आएको छ त्यति मात्रै होइन हिजो संक्रमितहरु नहुँदा सरकारले लकडाउन कडाइका साथ लागू गरेको थियो तर आज संक्रमितहरुको संख्यामा वृद्धि हुँदापनि सरकारले लकडाउन कडाइका साथ लागू नगरेको पनि कतिपयले गुनासो गर्दै आइरहेका छन ।