काठमाडौं । सिंगापुरको एक अदालतले ‘जुम भिडियो कल’ का माध्यमबाट अभियुक्तलाई फाँसीको सजाय सुनाएको छ ।

अदालतले ‘जुम भिडियो कल’ का माध्यमबाट एक मलेसियाली नागरिकलाई फाँसीको सजाय सुनाएको हो । सिंगापुरमा भिडियोको माध्यमबाट मृत्युदण्ड सुनाइएको यो पहिलो घटना हो ।

३७ वर्षीय पुनिथन गेनसानलाई २०११ मा अदालतले हेरोइन तस्करीको एक घटनामा दोषी ठहर गरेको थियो । यद्यपि, पुनिथनले उक्त घटनामा आफ्नो संलग्‍नता अस्वीकार गर्दै आएका छन् । उनले अदालतको फैसलाविरुद्ध अपिल गर्न सक्ने बीबीसीले जनाएको छ ।

मे महिनाको सुरुवातमा नाइजेरियामा पनि एक जनालाई २०१८ मा भएको एक हत्याका लागि जुमकै माध्यमबाट मृत्युदण्डको सजाय सुनाइएको थियो ।

ह्युमन राइट्स वाचले उक्त फैसलालाई ‘क्रूर र अमानवीय’ बताएको थियो । –बिबिसी

सांकेतिक तस्बिर