काठमाडौं । सरकारले नेपालको नयाँ नक्सा सार्वजनिक गरेको छ । भारतीय पक्षले अतिक्रमण गरेको नेपाली भूभागलाई समेटेर आज सरकारले राजनीतिक र प्रशासनिक नक्सा सार्वजनिक गरेको हो ।

भूमि व्यवस्था, सहकारी तथा गरिबी निवारण मन्त्रालयमा पत्रकार सम्मेलन गरी नेपालको आधिकारिक नक्सा सार्वजनिक गरिएको हो । सोमबार बसेको मन्त्रिपरिषद् बैठकले नेपालका छुटेका भूमि समेटिएको नक्सा पारित गरेको थियो । सरकारले भारतीय सेनाले कब्जा गरी बसेको कालापानी, लिपुलेक, लिम्पियाधुरासहितका भूभागलाई समेटेर नयाँ नक्सा सार्वजनिक गरेको हो । सरकारको नीति तथा कार्यक्रममा बोल्दै राष्ट्रपति विद्यादेवी भण्डारीले कालापानी, लिपुलेक र लिम्पियाधुरा सहितको भूभाग समेटिएको नेपालको नक्सा सार्वजनिक गर्ने बताएकी थिइन ।

त्यस्तै प्रधानमन्त्री केपी शर्मा ओलीले सरकारको नीति तथा कार्यक्रममा उठेका प्रश्नहरुको जवाफ दिने क्रममा पनि उक्त कुरा बताएका थिए । साथै उनले विवादित भूमिका विषयमा सरकारले कूटनीतिक वार्ताको तयारी थालेको पनि बताएका थिए ।