कपिलवस्तु । यशोधरा गाउँपालिका–ं६ को वासुदेव जनता माविको क्वारेन्टाइनबाट ११ जना भागेका छन । सोमबार ३ र मंगलबार ८ गरी ११ जना क्वारेन्टाइनबाट भागेका हुन् । भागेकाहरू सो वडाका रतनपुर र भैसाही गाउँको रहेको यशोधरा गाउँपालिकाका अध्यक्ष गिरजेश पाण्डेयले जानकारी दिए ।

१५ दिनको क्वारेन्टाइनको समयावधि पूरा भए पनि किट अभाव भन्दै करीब २० दिनसम्म परीक्षण नगरिएपछि उनीहरू भागेको उनले बताए । संघ र प्रदेश सरकारले समयमै परीक्षण किट उपलब्ध गराउन नसक्दा समस्या झन् बल्झिएको उनले बताए । खेतीको समय रहेकाले उनीहरू भागेको हुन सक्ने वडा नम्बर ६ का वडाध्यक्ष श्यामनारायण उपाध्यायले बताए । २ दिनमा गरी ११ जना भागेपछि खोजी गर्न प्रहरीचौकी रंगपुर, प्रशासन र गाउँपालिकालाई पत्राचार गरिएको वडाध्यक्ष उपाध्यायले बताए ।

गत शनिबार मात्रै यशोधरा ८ को खोरियास्थित सरस्वती प्राथमिक विद्यालय र सिहोखोरस्थित राष्ट्रिय निमाविमा रहेका ४६ जना क्वारेन्टिनबाट भागेका थिए । उनीहरूलाई भागेको २ दिनपछि फर्काएर पुनः सरस्वती विद्यालयमा निर्मित क्वारेन्टाइनमा राखिएको छ । त्यस्तै, सोमबार राति वडा नम्बर ५ को अनिरुद्ध पब्लिक माध्यमिक विद्यालयको क्वारेन्टाइनबाट समेत ४ जना भागेका थिए । भागेका सबैलाई पुनः क्वारेन्टाइनमा ल्याइएको कपिलवस्तुका प्रहरी उपरीक्षक दीपशम्शेर जबराले जानकारी दिए ।

क्वारेन्टाइन सञ्चालन गर्रिएका कतिपय स्थानमा पङ्खालगायत सुविधा र समयमै स्वाब परीक्षणको व्यवस्था नहुँदा बाहिरबाट आएकाहरुलाई क्वारेन्टाइनमा राख्न समस्या भएको संयोजक ज्योति दुबेले बताए ।

कपिलवस्तुमा अहिलेसम्म ४७ कोरोना सङ्क्रमित भेटिएका छन् । कोरोना संक्रमितको संख्या बढ्दै गइरहेकाले कपिलवस्तुलाई आगामी जेठ २० गतेसम्म अत्यावश्यक सेवाबाहेक सिल गरिएको छ ।