काठमाडौं । आइतबार विराटनगरमा २ जनालाई कोरोना संक्रमण देखिएपछि विराटनगर महानगरपालिकाले २ वटा बडालाई पूर्ण रुपमा सिल गरेको छ ।

विराटनगर ६ र १५ नं। वडामा २ जनामा कोरोना संक्रमण पुष्टि भएपछि बसेको जिल्लास्थित सुरक्षा निकायको बैठकले दुवै वडालाई सिल गर्ने निर्णय गरेको हो । सोमबार बिहानदेखि दुवै वडामा मानिसको आवतजावत र पसल बन्द रहेको जिल्ला प्रहरी कार्यालय मोरङका प्रमुख प्रहरी उपरीक्षक विश्व अधिकारीले जानकारी दिए ।

अधिकारीका अनुसार दुइटै वडामा औषधि, दूध र पानीबाहेक सबै प्रकारको सवारी साधन, आवतजावत पूर्णरूपमा बन्द छ । सुरक्षा निकायबीच आइतबार साँझ अनलाइन (भिडियो कन्फरेन्स) सुरक्षा बैठक बसेको थियो ।

सिल गरिएसँगै ती क्षेत्रमा बाक्लो सुरक्षाकर्मी परिचालन गरी कडाई गरिएको प्रहरी उपरीक्षक अधिकारीले बताए । कोरोना संक्रमण देखिएसँगै सोमबार बिहानैदेखि विराटनगरमा दिनहुँजस्तो हुने चहल पहलसमेत बन्द भएको छ । विराटनगरका सडक यतिबेला सुनसान देखिएको छ ।