झापाको सीमावर्ती पश्चिम बङ्गालको पानीटङ्कीनजिक क्वारन्टीनमा विगत दुई महिनादेखि अड्किएका नेपालीहरूलाई नेपाल प्रवेश गर्न दिन भारतीय पक्षले औपचारिक पत्रको माग गरेको बताइएको छ।

झापाका प्रमुख जिल्ला अधिकारी उदयबहादुर रानाका अनुसार भारतीय पक्षले सीमामा रहेका नेपाली पठाइदिने विवरणसहित पत्र मागेपछि सीमामा रहेका नेपालीलाई तत्काल नेपाल ल्याउन सम्भावना कम रहेको हो।

नेपाली अधिकारीहरूका अनुसार झन्डै ८०० जना अहिले भारतीय क्वारन्टीनमा छन्।

रानाले भने, “केन्द्र सरकारले ‘ल्याउनू’ भनेर आदेश दिएको छैन। भारतीय पक्षले सरकारी निकायबाट जारी भएको पत्र मागे। जुन अहिले सम्भव देखिएको छैन।”

दुई दिनअघि प्रदेश नं १ का आन्तरिक मामिला तथा कानुनमन्त्री हिक्मत कार्की र सामाजिक विकास राज्यमन्त्री जसमाया गजमेरको उपस्थितिमा भएको बैठकले सीमामा रहेका नेपालीहरूलाई सोमवारदेखि नेपाल ल्याइने निर्णय गरेको थियो।

बीबीसी