काठमाडौं । काठमाडौ प्रवेश गर्ने प्रमुख नाका नागढुंगामा स्वास्थकर्मीलाई दुव्यवहार गरेको आरोपमा एक युवा पक्राउ परेको छन् । वाग्मती प्रदेश जनस्वास्थ्य प्रयोगशालाका निर्देशक नारायण कार्कीलाई शुक्रबार नागढुङगा नाकामा उनी चढेकाे गाडी राेकेर अनाधिकृत चेकजाँच गर्ने युवा स्थानीय समुदायबाट कोभिड–१९ रोकथाम तथा नियन्त्रणका लागि सडकमा निस्किएको टोलीका सदस्य रहेको खुलेको छ ।

महानगरी प्रहरी परिसर काठमाडौंले आइतबार उनलाई चन्द्रागिरी नगरपालिकाबाट नियन्त्रणमा लिएपछि उनले अन्य ५०–६० जनाको समुह घटनाका दिन सोही क्षेत्रमा रहेको बताएका हुन् ।

परिसर प्रमुख एसएसपी श्यामलाल ज्ञवालीले चन्द्रागिरी नगरपालिकामा बसोबास गर्ने दोलखाका ७ वर्षे बालक र अर्की ३० वर्षीय महिलामा कोभिड–१९ को संक्रमण पुष्टि भएपछि स्थानीयहरु बाटो बन्द गर्न हिँडेको बताए । उनका अनुसार स्थानीय महिला सहितको समुहले बन्दाबन्दी कमजोर भएको भन्दै आफै नागढुङगा नाका र सो क्षेत्रबाट पैदल काठमाडौं प्रवेश गर्ने मार्गमा गस्ती गरेका थिए ।

“प्रहरी सडकमा उत्रिएको ठूलो समुहलाई सम्झाइ–बुझाइ गरिरहँदा युवाहरुको अर्को समुहले निर्देशक कार्कीमाथि दुर्ब्यवहार गरेछ,” एसएसपी ज्ञवालीले भने “हामीले नियन्त्रणमा लिएका छौं, कानून अनुसार कारबाही हुन्छ।”

प्रहरीका अनुसार आफै गाडी चलाएर आएका निर्देशक कार्कीसँग सवारी पास थिएन । उनी अत्यावश्यक कामका लागि काठमाडौं आएका थिए । नागढुङगामा युवाहरुले भिडियो बनाउदै उनको झोला चेकजाँच गर्नुका साथै उनलाई हप्काएका थिए ।

एसएसपी ज्ञवालीले स्वयमसेवकले गर्ने ब्यवहार घटनामा नदेखिएको बताए । चन्द्रागिरी नगरपालिकाले भने गृह मन्त्रालयसँगको समन्वयमा स्थानीय स्वयमसेवक परिचालन गरेको दाबी गर्दै आएको छ ।