काठमाडौं । सांसद डा. सुरेन्द्र यादव अपहरण प्रकरणमा नेपाल प्रहरीले अनुसन्धान पूरा गरेको छ । सांसद महेश बस्नेत, कृष्णकुमार श्रेष्ठ ‘किसान’ र पूर्वआईजीपी सर्वेन्द्र खनाल संलग्न अपहरण मुद्दाको अनुसन्धान पुरा भएको काठमाडौं प्रहरीले जानकारी दिएको छ ।

प्रहरीका अनुसार सांसद यादवलाई पक्राउ गरिएको भनिएको अनुसन्धानको कागजात सरकारी वकिलको कार्यालयमा पुगेको छ । प्रहरीले सांसद यादवको जाहेरी लिन नमानेपछि उनले सरकारी वकिलमार्फत जाहेरी दर्ता गराएका थिए । आफूलाई गत बैशाख १० मा रातारात अपहरण शैलीमा काठमाडौं ल्याएर होटलमा राखिएको सांसद यादवले बताउदै आएका छन ।

सरकारी वकिलको कार्यालयमा अपहरण अभियोगमा अनुसन्धानको कागजात पेश गरेको प्रहरीले सांसद यादवलाई अपहरण नै गरिएको हो या होइन भन्ने कुरा भने खुलाएको छैन । यस विषयमा सरकारी वकिलको कार्यालयले नै अन्तिम काम अर्थात अपहरणको मुद्दा चलाउने या नचलाउने भन्ने कुराको निर्णय गर्नेछ ।