काठमाडौं । कोरोना भाइरसको संक्रमणबाट मृत्यु भएकी सिन्धुपाल्चोककी २९ वर्षीय महिलाबाट जन्मिएको शिशुसहित ४ जनालाई धुलिखेल अस्पतालको आइसोलेसनमा राखिएको छ ।

स्वास्थ्य कार्यालय काभ्रेका प्रमुख डा। नागेन्द्र झाका अनुसार कोरोना संक्रमण देखिएर मृत्यु भएकी महिलाको नवजात शिशु (छोरा), श्रीमान्, सासू र अस्पतालसम्म ल्याउन सहयोग गर्ने एक आफन्तलाई अस्पतालको आइसोलेसनमा राखिएको छ । शनिबार बेलुका ती चारैजनाको नमुना संकलन गरिएको र परीक्षणका क्रममा रहेको उनले जानकारी दिए । उनका अनुसार आज बेलुकासम्ममा त्यसको रिपोर्ट आउनेछ । “सात चिकित्सक र नर्सलाई क्वारेन्टाइनमा राखिएको छ,” उनले भने ।

मृतक महिलालाई गत बैशाख २३ गते त्रिवि शिक्षण अस्पताल, महाराजगञ्जमा सुत्केरीका लागि भर्ना गरिएको थियो । उनको डेलिभरी भैसकेपछि बैशाख २५ गते उनलाई त्यहाँबाट डिस्चार्ज गरेर सिन्धुपाल्चोक लगिएको थियो । उनलाई ज्वरो, श्वासप्रश्वासमा समस्या भएपछि त्यहाँको स्थानीय अस्पतालमा उपचारका लागि भर्ना गरिएको थियो । उनको स्वास्थ्य अवस्थामा सुधार नआएपछि थप उपचारका लागि धुलिखेल अस्पतालमा रिफर गरिएको थियो । ती महिलालाई अस्पताल लैजादै गर्दा बाटोमै मृत्यु भएको थियो ।

उनको मृत्यु भैसकेपछि धुलिखेल अस्पतालले उनको आरडिटी र पिसिआर रिपोर्ट परीक्षण गरेको थियो । ती दुबै रिपोर्ट पोजेटिभ देखिएपछि अस्पतालले उनको स्वाब थप परीक्षणका लागि राष्ट्रिय जनस्वास्थ्य प्रयोगशाला, काठमाडौं पठाएको थियो । त्यहाँ पनि उनको रिपोर्ट पोजेटिभ देखिएपछि उनको मृत्यु कोरोना भाइरसबाट भएको पुष्टि भएको हो ।