काठमाडौं । गौरीफण्टा नाकाबाट आज नेपालीको उद्धार गरिएको छ । आज रामपुर क्वारेन्टाइनमा रहेका ९२ सहित त्यहाँका अन्य भारतीय क्वारेन्टाइनमा राखिएका २ सय ७६ नेपालीको उद्धार गरिएको हो ।  

कार्यालयका सूचना अधिकारी शिवराज जोशीका अनुसार उद्धार गरिएकामध्ये अहिलेसम्म १ सय २३ जनाको आरडीटी गरिएको र बाँकीको टेस्ट भइरहेको छ । उनका अनुसार उद्धार गरिएका १ सय ६ जनालाई कैलाली बहुमुखी क्याम्पसको क्वारेन्टाइनमा राखिएको छ । सूचना अधिकारी जोशीका अनुसार उद्धार गरिएकाहरुलाई सम्बन्धित जिल्लामा पठाइएको छ र उनीहरुलाई त्यहाँका स्थानीय तहहरुले नै क्वारेन्टाइनमा राख्ने बताइएको छ ।

शुक्रबार पनि सीमावर्ती भारतीय क्वारेन्टाइनमा रहेका ३ सय ८५ नेपालीको उद्धार गरिएको थियो । उनीहरूमध्ये ३ सय २४ जनाको सीमा क्षेत्रमै आरडीटी परीक्षण गरिएको थियो भने बाँकी ६१ जनाको पीसीआर परीक्षणका लागि थ्रोट स्वाबको नमुना संकलन गरिएको छ ।

भारतका विभिन्न ठाउँहरुबाट नेपाल आएका उनीहरुको कोरोना परीक्षण विशेष प्राथमिकताका साथ भैरहेको छ ।