काठमाडौं । नेपाल आयल निगमले पेट्रोलियम पदार्थको मूल्य यथावत कायम गरेको छ । अहिले बजारमा पेट्रोलियम पदार्थको माग न्यून भएकाले मूल्य यथावत कायम गरिएको हो ।

आयल निगमका प्रवक्ता विनितमणी उपाध्यायका अनुसार बजारमा पेट्रोलियम पदार्थको माग अत्यधिक न्यून भएको र कोरोनाका कारण विशेष परिस्थिति जारी रहेका कारण पेट्रोलियम पदार्थको बिक्री मूल्य यथावत् कायम गरिएको हो । भारतीय आयल निगमले नेपाल निगमलाई पठाएको नयाँ खरिद मूल्य सूची अनुसार निगमलाई भारतबाट पेट्रोल खरिद गर्दा ५ रुपैयाँ ५६ पैसा बढी पर्नेछ । डिजेलको मूल्य भने २८ पैसा घटेर आएको छ ।

निगमले यसअघि दुईपल्ट पेट्रोलियम पदार्थको मूल्य यथावत् राखेको थियो । भारतीय आयल निगमबाट मूल्य घटेर आएको भएपनि वैशाख ४ गते र वैशाख १९ गते निगमले पेट्रोलिम पदार्थको मूल्य यथावत् राखेको थियो । त्यसअघि पेट्रोल डिजेल र मट्टितेलको मूल्य प्रतिलिटर १० रुपैयाँले घटाइएको थियो जसको बिरोध व्यवसायीले गरेका थिए ।