काठमाडौं । लकडाउनको समयावधिमा अत्यावश्यक सेवामा कुनै समस्या आए नेपाल प्रहरीले १०० नम्बरमा सम्पर्क गर्न आग्रह गरेको छ । यो नम्बरमा सम्पर्क गर्दा पैसा लाग्दैन । कोरोना भाइरसको महामारीका कारण अत्यावश्यक सेवाका लागि बाहिर निस्कदा समस्या उत्पन्न भएकाले प्रहरीले यस विषयमा समन्वय गर्न थालेको हो ।

यसबाहेक नजिकैको प्रहरी कार्यालयमा पनि सम्पर्क गर्न सकिने महानगरीय प्रहरी कार्यालय रानीपोखरीका डीआईजी विश्वराज पोखरेलले बताए । उनले भने, “उपत्यकाका तीनओटै जिल्लामा उपचार गर्न, औषधि लिन वा अन्य जरुरी काम परे प्रहरीसँग सम्पर्क गर्न सकिन्छ । समस्याको पहिचान गरी हामीले आवश्यक समन्वय गर्छौं । दैनिक सयौं फोन पनि आइरहेकै छन् ।” उपत्यकाबाहेक अन्य जिल्लामा पनि प्रहरीले समन्वय गर्दै आएको छ । भोलि (शनिबार) बाट लागु हुने गरी यसअघि जारी भएका सबै पास रद्द गर्ने गृह मन्त्रालयले निर्णय गरिसकेको छ । अब मन्त्रालय, नियामक निकाय र जिल्ला प्रशासन कार्यालयले आफ्नो कार्यक्षेत्र हेरेर नयाँ पास जारी गर्ने तयारी छ । तर यो व्यवस्था जेठ ५ गतेबाट लागु हुने बताइएको छ । पासको दुरुपयोग बढेको पाइएपछि गृह पास रद्द गर्ने निष्कर्षमा पुगेको थियो ।

काठमाडौं उपत्यकामा मात्रै लकडाउनको अवधिमा पासको दुरुपयोग गरेको पाइएपछि २२ सय बढी पास प्रहरीले सिज गरेको थियो । डीआईजी पोखरेल भन्छन्, “कार्यालय प्रयोजनका लागि पास लिने । त्यही पासले श्रीमती घुमाउने, किनमेल गर्ने, मान्छे बोक्नेसम्म गतिविधि देखिए । यस्तोमा पास खारेज गर्नु नै उपयुक्त विधि हो । साँच्चिकै समस्या परेकाहरू प्रहरीको सम्पर्कमा आउन सक्छन् ।”

उपत्यकामा १० हजारको हाराहारीमा जिल्ला प्रशासनबाट पास जारी भएको बताइन्छ । ५ गतेपछि नयाँ पास लिएकाले पनि दुरुपयोग गरेको पाइए प्रहरीले कारबाही गर्ने पोखरेल बताउँछन् । सरकारले गरेको निर्णय र अनुरोध पालना गर्नु नागरिकको दायित्व भएको पोखरेलको तर्क छ । उनले भने, “सुरक्षाकर्मीलाई छलेर कोरोना भाग्दैन । यो हामी सबैको साझा दायित्व हो । प्रहरी सडकमा खटिएको नागरिककै सुरक्षाका लागि हो । कोरोना साझा लडाइँ हो । त्यसैले हामी सबै जिम्मेवार बनौं ।”

डीआईजी पोखरेलका अनुसार काठमाडौं उपत्यकामा दैनिक ५ हजार बढी हेल्पकल आउने गरेका छन् । उनीहरूले आफूहरू समस्यामा परेको, प्रहरीबाट खोजेको सहयोगलगायतको माग गर्ने गरेको पोखरेल बताउँछन् । यस्तै लकडाउनको अवधिमा हालसम्म काठमाडौं उपत्यकामा २७ लाख नौ हजार १९७ जनाले प्रहरीका विभिन्न कार्यालयमा हेल्पकल गरेका छन् ।