काठमाडौँ । बिहीबार स्वास्थ्य तथा जनसङ्ख्या मन्त्रालयले एक विज्ञप्ति निकाल्यो जसमा प्रस्टै लेखिएको थियो–‘अद्यावधिक विवरण अनुसार कोभिड–१९ का पुष्टि भएकाहरूको जम्मा सङ्ख्या २५० पुगेको छ ।’ यसको केही समयपछि फेरी अर्को विज्ञप्ति सार्वजनिक भयो जसमा लेखिएको थियो–‘अद्यावधिक विवरण अनुसार कोभिड–१९ का पुष्टि भएकाहरूको जम्मा सङ्ख्या २४५ नै रहेको छ । पछिल्लो अद्यावधिक विवरण अनुसार २५० भएकोमा प्राविधिक कारणले पहिले नै पुष्टि भएका ५ जनाको विवरण पुन रिपोर्टिङ भएको जानकारी गराइन्छ ।’ जसमा मन्त्रालयका सह–प्रवक्ता डा समिरकुमार अधिकारीले हस्ताक्षर गरेका थिए ।

स्वास्थ्य मन्त्रालयको यो विज्ञप्ति पश्चात् सबै सञ्चार माध्यमले नेपालमा कोरोना सङ्क्रमितको सङ्ख्या २५० पुग्यो भनेर धमाधम लेखे । त्यसको केही समयपछि प्राविधिक कारणले गल्ती भएको मन्त्रालयले स्वीकार गरेपछि लेखिएको त्यो समाचार झुट साबित भैदियो । आम सर्वसाधारणको आँखामा छारो हाल्ने काम गर्‍यो मन्त्रालयले । यसरी सम्बन्धित ठाउँबाट नै गलत सूचनाहरू सम्प्रेषित भइरहँदा आम जनतामा त्रासको वातावरण सृजना भएको छ । सङ्क्रमितको सङ्ख्या बढेकोमा जनतालाई आपत्ति छैन तर सूचनाको आदानप्रदान गर्ने मुख्य जिम्मेवारी निकायबाट नै यस्ता गलत सूचना सम्प्रेषण हुँदा उनीहरूमा थप त्रासको वातावरण पैदा भएको छ । उनीहरूलाई एकातर्फ कोरोनाको जोखिमसँग जुध्न हम्मे हम्मे भएको त छ नै त्यसमा पनि यस्ता गलत सूचनाले झनै समस्या उत्पन्न गराइदिएको छ ।

मन्त्रालयले विज्ञप्ति सार्वजनिक नगरेसम्म कुनै पनि सञ्चार माध्यमले यो सूचना प्रकाशन, प्रसारण गर्न पाउदैनन । त्यो अधिकार उनीहरूलाई दिइएको छैन । मन्त्रालयले विज्ञप्ति सार्वजनिक गरेपछि मात्रै सञ्चार माध्यमले यो अधिकार पाउँने गर्छन् ।

यसरी मन्त्रालयको आजको विज्ञप्ति हेर्दा आजसम्म कोरोना सङ्क्रमण पुष्टि भएका जति पनि छन् भनिएको छ उनीहरूमा कतै सङ्क्रमण नै नभएको पो हो कि ? कतै मन्त्रालयले यस्तै गलत सूचना प्रचार पो गरेको हो कि ? भन्ने तमाम प्रश्नहरू खडा भएका छन् । यद्यपि मन्त्रालयले प्राविधिक कारणले यस्तो हुन गएको भनेर गल्ती स्वीकार गरिसकेको छ ।