काठमाडौं । अब  बाहिरबाट मध्यपुर थिमिमा आउनले अनिवार्य कोरोना परीक्षण गर्नुपर्ने भएको छ ।भक्तपुरको मध्यपुर थिमि नगरपालिकाले काठमाडौँ उपत्यका बाहिरबाट आउनेलाई कोरोना संक्रमण भए/नभएको परीक्षण नगरी घरमा राख्ने घरबेटीलाई कारबाही गर्ने भएको हो । 

नगरपालिकाले विज्ञप्ती जारी गर्दै नगर क्षेत्रभित्र आफ्नो घर वा भाडामा बस्ने व्यक्तिहरु उपत्यका बाहिर गएको भए फर्की आउन नदिने र आएको भए परीक्षण अनिवार्य गराउन भनेको हो। ‘कोरोना भाइरस संक्रमणको प्रभाव यस नगरपालिकामासमेत देखिएकोले यस गम्भिर परिस्थितिलाई मध्यनजर गरी यस नगरपालिका क्षेत्रभित्र पर्ने अरनिको राजमार्ग र भत्तपुर जाने पुरानो राजमार्ग बाहेक अन्य सडक पूर्णरुपमा निषेध गर्ने,’ विज्ञप्तीमा भनिएको छ, ‘नगर क्षेत्रभित्र आफ्नो घर वा भाडामा बस्ने व्यक्तिहरु उपत्यका बाहिर गएको भए फर्की आउन नदिने र आएको भए परीक्षण नगरी प्रवेश नदिन सम्बन्धित घरधनीलाई सजग गर्ने, गराउने र सो गरेको नपाइएमा घरधनीलाई कडा कारबाहीको लागि सम्बन्धिन कार्यालयमा सिफारिस गर्ने।’ 

नगरपालिकाले नगरक्षेत्रभित्र संचालनमा रहेका विभन्न व्यवसायमध्ये खाद्यान्न, औषधी तथा अति आवश्यक बस्तुका पसल विहान ९ बजेसम्म मात्र संचालन गर्न दिने निर्णय गरेको छ। 

अन्य व्यवसायहरु अर्काे सूचना जारी नभएसम्मका लागि बन्द गर्न पनि नगरपालिकाले निर्देशन दिएको छ।