काठमाडौं । पछिल्लो समय भारतले नेपाली भूमिमा जर्बजस्त रुपमा बनाएको सडकलाई लिएर यत्रतत्र विरोध चलिरहँदा यस विषयमा समान धारणा बनाउनका लागि सरकारले आज सर्वदलीय बैठक बोलाएको छ ।

प्रधानमन्त्री केपी शर्मा ओलीले आफ्नो भूमिमा भारतले सडक निर्माण गरेपछि यस विषयमा सबै दलको समान धारणा बनाउन बैठक बोलाएका हुन । बैठक आज साँझ ४:३० बजे बोलाइएको प्रधानमन्त्रीका राजनीतिक सल्लाहकार विष्णु रिमालले जानकारी दिए । उनका अनुसार बैठकमा संसदमा प्रतिनिधित्व गर्ने सबै दलका अध्यक्ष र पूर्वप्रधानमन्त्रीहरूलाई पनि बोलाइएको छ ।

गत शुक्रबार भारतीय रक्षामन्त्री राजनाथ सिंहले नेपालको दार्चुलाको भूमि प्रयोग गरेर तिब्बत जोड्ने सडक मार्गको उद्घाटन गरेपछि नेपालमा त्यसको व्यापक विरोध भइरहेको छ । सरकारले उक्त विषयमा काठमाडौंस्थित भारतीय दूतावासलाई कूटनीतिक नोटसमेत पठाएको छ । भारतले एकतर्फी रुपमा सडकको उद्घाटन गरेपछि सरकारले विज्ञप्ति जारी गर्दै वार्तामा आउन आग्रह गरेको थियो ।

त्यसपछि भारतीय विदेश मन्त्रालयले उक्त सडक आफ्नै भूमिमा बनाएको जानकारी दिएको थियो । मन्त्रालयले कोरोना संक्रमणपछि मात्रै वार्तामा आउन तत्पर रहेको बताएको थियो ।