सुर्खेत । जिल्लाको सिम्ता गाउँपालिका–३ स्थित प्रहरी चौकी आग्रीगाउँमा कार्यरत प्रहरी जवान नरेन्द्र खड्का कञ्चटमा गोली लागेको अवस्थामा प्रहरी चौकी नजिकैको जंगलमा फेला परेका छन् ।

एक थान पेस्तोल र सात राउण्ड गोलीसहित सोमबार राति उनी प्रहरी चौकीबाट बाहिरिएका थिए । सोमबार रातिबाट हराएका खड्का चौकी माथितिर रहेको जंगलमा कञ्चटमा गोली लागेको अवस्थामा फेला परेको कर्णाली प्रहरी प्रदेश प्रमुख डिआइजी वसन्तकुमार पन्तले बताए ।

घटनापश्चात् जिल्ला प्रहरी कार्यालय सुर्खेतबाट प्रहरी उपरीक्षक दिल्लीराज पन्त, प्रहरी अनुसन्धान अधिकृत भरत शाहसहितको टोली घटनास्थलतर्फ गएको छ । उक्त घटना के कारणले भयो ? र कसले गराएको हो ? भन्ने विषयमा प्रहरीले थप अनुसन्धान गरिरहेको प्रदेश प्रहरी कार्यालयले जनाएको छ ।