काठमाडौं । नेपाल कम्युनिष्ट पार्टीका सांसद नवराज सिलवालले संसदमा कविताबाटै प्रतिपक्षलाई व्यङग्य हानेका छन । संसदमा चलिरहेको बजेट अधिवेशनमा उनले कवितामार्फत व्यङग्य प्रस्तुत गरेका हुन ।

प्रस्तुत छ उनको कविता

हाम्रो देश हिजोपनि अतिक्रमणमै थियो
सीमाना निरन्तर दुखेकै थियो
विस्तारवादीहरुको अतिक्रमण,
भ्रष्टचारीहरुको अतिक्रमण,
दलाल, नोकरशाहीहरुको अतिक्रमण,
भोका, नाङगा, साधारणमाथिको अतिक्रमण,
निरन्तर नै थियो अतिक्रमण ।

हिजो उनीहरु नै वर्षौवर्ष सत्तामा थिए
केही ठोस गरेको पनि सुनिएन
अनायास झसङग निन्द्राबाट बिउँझे झै
आज आवाज ठूलो सुनिएको छ
हिजो सत्तामा उन्माद मच्चाएकै हुन,
पुलिस र अदालत छप्काएकै हुन
विचौलियाको कमिसन पचाएकै हुन ।

जेहोस आज हामी सबै फरक परिस्थितिमा उभिएका छौ
मुलुकको अस्मिता जोगाउनुपर्ने स्थितिमा छौ
इतिहासको संघीन मोडमा सरकारमाथि प्रहार गरेर मात्र होइन,
बरु सरकार र प्रतिपक्ष सँगै उभिएर
राष्ट्रिय स्वाभिमानको संवद्र्धनका खातिर
सरकार, संसद र सडकबाट
संयुक्त आवाज,
संयुक्त पहल,
संयुक्त राष्ट्रियमोर्चा,
आजको आवश्यकता ।