दाङ । नेपाल प्रहरीले दाङको तुलसीपुरमा लकडाउनको अवज्ञा गर्ने २१ जना व्यापारीहरुलाई पक्राउ गरेको छ ।

अत्यावश्यक सेवाअन्तर्गत खाद्य वस्तु खरिदका लागि बिहान ६ देखि ९ बजेसम्म पसल खोल्नुपर्नेमा कस्मेटिक, कपडा, हार्डवेयर, इलेक्ट्रिक, छापाखानासमेत खोलेको भन्दै प्रहरीले २१ जनालाई पक्राउ गरी हिरासतमा राखेको छ ।

प्रहरीले व्यापारीहरुलाई पटक÷पटक पसल नखोल्न आग्रह गर्दासमेत अटेर गरी पसल खोलेको र अनावश्यक मात्रामा भिडभाड गरेकाले कोरोना संक्रमणको जोखिम बढाएको भन्दै उनीहरुलाई प्रहरीले पक्राउ गरेको हो । पक्राउ गरिएकाहरुलाई प्रहरीले संक्रामक रोग सार्ने कसुरमा मुद्दा चलाउने गर्छ तर इलाका प्रहरी कार्यालय तुलसीपुरले भने पक्राउ परेकाहरुलाई रिहा गर्ने गरेको छ ।

यसअघि पनि प्रहरीले करिब ९२ जनालाई पक्राउ गरेर छाडिसकेको छ । अत्यावश्यक सेवाबाहेकका अन्य सेवाहरु अहिले सञ्चालन नगर्न सरकारले आग्रह गरेपनि व्यापारीहरुले अटेरी गर्दै आएका छन ।