काठमाडौं । नेपाली युवा दिवेश पोखरेल अर्थात् आर्थर गन अमेरिकन आइडलको टप–७ मा उक्लिएका छन् । उनले टप–७ प्रवेशका लागि आइतबार डिज्नेको ‘लिटल मर्मेड’ को ‘किस द गर्ल’ गीत गाएका थिए ।

अमेरिकन आइडलले प्रतिस्पर्धीलाई एसएमएस, आइडलको वेभसाइट र एप डाउनलोड गरेर भोट गर्न सकिने व्यवस्था गरेको छ । दिवेशको भोटिङ कोड १६ रहेको छ । ३ वटा माध्यमबाट १ जनाले प्रतिस्पर्धीलाई १०÷१० पटक गरेर ३० भोट गर्न सकिने व्यवस्था गरिएको छ ।

दिवेश हाल अमेरिकाको क्यान्सस राज्यको विचिटामा बसोबास गर्दै आइरहेका छन् ।

सन् २०१३ मा अमेरिका गएका गायक पोखरेलले यसअघि ‘न्यानो घर’, ‘मन’, ‘समुन्द्र पारी’, ‘कर्णाली’, ‘प्रलय ए’ र ‘प्रलय बी’ जस्ता गीत सार्वजनिक गरिसकेका छन् ।