काठमाडौं । नेपाल कम्युनिस्ट पार्टी (नेकपा) का अध्यक्ष एवम् पूर्वप्रधानमन्त्री पुष्पकमल दाहाल प्रचण्डले भारतले नेपालको सीमा अतिक्रमण गरेको विषयमा सरकारले अपनाउने कुटनैतिक पहल ठीक हुनुपर्ने बताएका छन् । प्रतिनिधिसभा राज्य व्यवस्था तथा सुशासन समितिको आइतबारको बैठकमा अध्यक्ष दाहालले सरकारले दिने वक्तव्य अर्थात् चिठी नीतिगत, सैद्धान्तिक र भावनात्मक रूपमा ठीक भए पनि त्यसपछिको कदम पनि सही ढंगले चाल्नुपर्ने बताएका हुन् ।

समितिका अन्य सदस्यहरूले सरकारले खाली चिठी मात्रै पठाउने तर एक्सनमा जाँदा कुनै काम नभएको बताएपछि अध्यक्ष दाहालले उक्त कुरामा आफू सहमत भएको बताए ।

उनले भने, ‘सरकारको तर्फबाट दिने भनिएको परराष्ट्र मन्त्रालयको तर्फबाट दिने भनिएको वक्तव्य पनि मैले हेरेँ र उक्त लेटर नीतिगत, सैद्धान्तिक, भावनात्मक रूपमा पनि ठीकै छ । त्यो लेटरमा चिजहरू जो ओरियन्टेसन दिइएको छ, त्यो ओरियन्टेसन बेठिक छैन् भन्ने मलाई लाग्छ । यहाँ माननीय सदस्यहरूले पनि लेटर मात्रै ठीक भएर भएन्, एक्सन पनि ठीक हुन पर्‍यो भन्नुभएको छ, यसमा म सहमत छु ।’

विवादित सीमाका विषयमा भारत र चीन दुवै देशसँग छलफल गरिएको अध्यक्ष प्रचण्डको भनाइ छ । भारत र चीनले लिपुलेकको विषयमा गरेका सम्झौतापछि यो समस्या भारतसँगको मात्रै नभई त्रिदेशीय बनेको उनले बताए ।