काठमाडौँ । सिन्धुलीको एक स्थानीय तहमा सरकारी बजेटको अभावमा हजारौँ खेतीयोग्य जमिन मरुभूमिमा परिणत हुन लागेको छ । जिल्लाको दुधौली नगरपालिका – ५ घरिथुन्सीमा रहेको उक्त जमिन सरकारी बेवास्ताका कारण यस्तो अवस्थामा परिणत हुन लागेको हो ।

उक्त जमिनलाई त्यहाँ अवस्थित कमला नदीले कटान गर्न थालेपछि जमिनको हालत यस्तो हुन गएको स्थानीयहरूको गुनासो रहेको छ । जसको प्रत्यक्ष प्रभाव त्यहाँका किसानहरूमा परेको छ । सरकारी तवरबाट संरक्षण गरिनुपर्ने उक्त खेतीयोग्य जमिनमा सरकारी पदाधिकारीहरूको चरम लापरबाहीका कारण धराशायी बन्ने अवस्थामा पुगेको छ । यसले गर्दा त्यहाँ रहेको सरस्वती निमावि र एउटा क्लबको खेल मैदान पनि उच्च जोखिममा रहेका छन् ।

नगरपालिका प्रमुख घनश्याम राउत, उपप्रमुख बाल कुमारी अधिकारी र त्यहाँका वडा अध्यक्ष चन्द्र किशोर थारु लगायतका सरकारी प्रतिनिधिहरूले जमिनको अनुगमन पनि गरे तर उनीहरू त्यसयता फर्केर पनि आएनन् । उनीहरूको अनुगमनबाट जनताले केही बजेटको अपेक्षा गरेका थिए तर उनीहरू फेरि फर्किएर नआएपछि स्थानीयहरू झन् पीडामा परेका छन् । यीभन्दा अघिल्ला सरकारले उक्त जमिनका लागि आवश्यक बजेट छुट्ट्याउने गरेको स्थानीयहरू बताउँछन् ।

नजिकिँदै गरेको वर्षा यामको समयलाई लिएर जमिनको अवस्था झनै जीर्ण बन्ने र खेतीयोग्य जमिन भासिँदै जाने भएकाले स्थानीय कृषहरुमा थप निराशा समेत पैदा भएको छ । उनीहरू अझै स्थानीय सरकार, प्रदेश सरकार र केन्द्रीय सरकारले सम्बन्धित जमिनका लागि आवश्यक बजेटको व्यवस्था गरिदिए हुन्थ्यो भन्ने आशामा छन् ।