काठमाडौं । नेपाली भूमिमाथि भारतीय पक्षले अतिक्रमण गरेर सडक निर्माण गरेको विरोधमा काठमाडौंस्थित भारतीय दूतावास अगाडि प्रदर्शन गर्न पुगेका विद्यार्थी नेताहरुलाई प्रहरीले पक्राउ गरेको छ ।

लिपुलेक कालापानीमा नेपाली भूमि मिचेर भारतले सडक निर्माण गरेको विरोधमा प्रदर्शन कार्यक्रम आयोजना गरिएको अनेरास्ववियूका नेता यशु लामाले बताइन् । लैनचौरमा सामाजिक दूरी कायम गर्दै शान्तिपूर्ण रूपमा आयोजना गरिएको प्रदर्शनका क्रममा आधा दर्जन बढी साथीहरू पक्राउ परेका लामाले बताइन् ।

भिडियो

उनका अनुसार भारतले नेपाली भूमि अतिक्रमणविरुद्ध भारतीय दूतावासअगाडि प्रदर्शन गर्ने क्रममा अनेरास्ववियूका केन्द्रिय नेता तथा अनेरास्ववियु पूर्वसचिव सुदेश पराजुली, केन्द्रीय कमिटी सदस्यहरू अशोक थापा, महेश श्रेष्ठ, उत्तर खड्का, न्युसन लामिछाने, अनेरास्ववियूका पूर्वनेताहरू विनोद खुलाल, प्रेम प्रधानलगायतलाई प्रहरीले पक्राउ गरेको हो । उनले पक्राउ परेका सबै साथीहरूलाई निःसर्त रिहाइको माग गरेकी छन् । साथै सीमासम्बन्धी समस्या समाधानका निमित्त कूटनीतिक तवरबाट पहल कदमी र नेतृत्व गर्न सरकारसँग माग गरेकी छन् ।

नेपाली भूमिमा भारतीय हस्तक्षेप गरिरहँदा नेपाल सरकार अहिलेसम्म केहीपनि बोल्न सकिरहेको छैन । हिजो कालापानी, लिपुलेक र लिम्पियाधुरा सहितको नक्सा सार्वजनिक गरेको भारतले फेरि नेपाली भूमिमा अतिक्रमण गर्न खोजेको हो । जसको चौतर्फी विरोध भैरहेको छ ।