सांसद अपहरण प्रकरणमा अनुसन्धान गर्न प्रहरी टोली महोत्तरी पुग्यो : बस्नेत, श्रेष्ठ र खनाललाई कारवाही होला ?

काठमाडौं । जबर्जस्ती अपहरण शैलीमा काठमाडौं ल्याइएका सांसद सुरेन्द्र यादवको अपहरण प्रकरणबारे अनुसन्धान गर्न आज काठमाडौंबाट प्रहरीको टोली महोत्तरी प्रस्थान गरेको छ । प्रहरी अधिकृत सहितको टोली महोत्तरी प्रस्थान गरेको हो ।
आजमात्रै जिल्ला सरकारी वकिलको कार्यालयले प्रहरीलाई नेकपाका सासंदद्वय महेश बस्नेत, कृष्णकुमार श्रेष्ठ र पूर्व आइजीपी सर्वेन्द्र खनालविरुद्धको अपहरण तथा शरीर बन्धकसम्बन्धी कसुरमा अनुसन्धान सुरु गर्न दर्ता गरेको जाहेरी पठाएको थियो ।
सरकारी वकिलको कार्यालयले महानगरीय प्रहरी परिसर काठमाडौंलाई सांसद सुरेन्द्र यादवले दिएको अपहरणसम्बन्धीको जाहेरी दर्खास्त पठाएपछि प्रहरीले अनुसन्धान सुरु गरेको हो । एक उच्च प्रहरी अधिकारीले भने, “महोत्तरीबाटै घटना सुरु भएको दाबी गरिएकाले त्यहाँको वस्तुस्थितिको अध्ययन गर्नुपर्ने देखियो । त्यसैले अनुसन्धान टोली पठाएका हौं । महोत्तरीबाट अनुसन्धान टोली फर्किएपछि थप कुरा खुल्न सक्छ ।”
लकडाउनको समयमा पनि उनको गृहजिल्लामा नै गएर सांसद बस्नेत, सांसद श्रेष्ठ र पूर्वआइजीपि खनालले सांसद यादवलाई रातारात काठमाडौं ल्याइएको थियो । सांसद यादवले आफूलाई अपहरण शैलीमा काठमाडौं ल्याइएको आरोप लगाएदै आएका छन ।
प्रतिक्रिया दिनुहोस्