काठमाडौं । नेकपाका अध्यक्षसमेत रहेका संसदीय दलका नेता केपी शर्मा ओलीसँगको छलफलका लागि संसदको बजेट अधिवेश सुरु हुनु अघि सत्तारुढ दल नेपाल कम्युनिस्ट पार्टी (नेकपा)का नेताहरु बालुवाटार पुगेका छन् ।

महासचिव विष्णु पौडेल संसदीय दलका उपनेता सुवास नेम्वाङ, प्रमुख सचेतक देव गुरुङ, सचेतक शान्ता चौधरी लगायत बालुवाटार पुगेका पुगेका थिए ।

शुक्रबार(आज) अपराह्न चार बजे संसद बैठक आह्वान गरिएको छ । बैठक अघि संसदीय दलको बैठक बस्ने प्रचलन रहेको भएपनि कोरोना भाइरसको महामारीका कारण बैठक बस्ने सहज अवस्था नभएपछि नेताहरु अनौपचारिक छलफलका लागि बालुवाटार पुगेका हुन् ।

कोरोनाका कारण सामाजिक दूरी कायम गर्नुपर्ने अवस्था रहेको र बैठक बस्ने सम्भावना नभएका कारण अनौपचारिक रुपमा छलफल भएको संसदीय दलका उपनेता सुवास नेम्वाङले जानकारी दिए ।

बालुवाटारमा नेताहरुबीच ९ बजेदेखि ११ बजेसम्म छलफल भएको थियो । प्रधानमन्त्रीसँग नेताहरुले संसद बैठक र बजेटका बारेमा छलफल गरेका थिए । नेताहरुसँगको छलफलपछि पार्टी अध्यक्षद्वय ओली र प्रचण्डबीचपनि छुट्टै छलफल भएको थियो ।