धनगढी । कोरोना परीक्षणका लागि किटको अभाव भएपछि सुदूरपश्चिममा कोरोना परीक्षण आज पनि हुन सकेको छैन् । धनगढीको पशु अन्वेषण प्रयोगशालामा स्थापना गरिएको आरटी–पीसीआर मेसिन मार्फत हुने कोरोना परीक्षण किट अभावका कारण आज पनि परीक्षण हुन नसकेको हो ।

बुधवार साँझ चार जनाको परीक्षण भएकोमा त्यसयता किटको मौज्दात सकिएपछि कोरोना परीक्षण हुन सकेको छैन् । किटको अभाव भएपछि परीक्षणका लागि द्ुइ दिनदेखि संकलन गरिएका नमुना संकलनहरु त्यसै थन्किएका छन । विभिन्न जिल्लाबाट शंकास्पद ५५ जनाको थ्रोट स्वाबको नमूना संकलन गरी प्रयोगशालामा पठाईएकोमा परीक्षण नहुँदा त्यसै थन्काइएको छ । प्रयोगशालाका अनुसार पीसीआर विधिबाट कोरोना परीक्षण गर्दा पीसीआर किट र आरएनए एक्पेक्सन किट आवश्यक हुने गरेको छ । पीसीआर किटको मौज्दात भएपनि आरएनए एक्पेक्सन किट सकिएपछि परीक्षण बन्द भएको प्रयोगशालाले जनाएको छ ।

अत्यावश्यक परीक्षणका लागि १० वटा किट भने राखिएको छ । किटको अभाव भएपछि सेती प्रादेशिक अस्पताल धनगढीमा उपचारपछि निको भएर घर फर्केका तीन जना बिरामीको पुनः परीक्षण समेत गर्न सकिएको छैन् । किट अभावका काररण संकलित नमूनाको समेत परीक्षण रोकिएपछि शंकास्पदको नमूना संकलन समेत अहिलेलाई बन्द गरिएको छ । यता सुदूरपश्चिमको सामाजिक विकास मन्त्रालयका स्वास्थ्य महाशाखा प्रमुख नरेन्द्र कार्कीले पनि किटको मौज्दात सकिएको बताउँदै आज सम्म संघीय सरकारले पठाउने जानकारी आएको बताए ।

उनका अनुसार आजसम्म संघीय स्वास्थ्य मन्त्रालयले सुदूरपश्चिम प्रदेशका लागि तीन सय बढि किट पठाउने तयारी गरेको छ । संघबाट आजै किट आएपनि परीक्षण हुन समय लाग्ने भएको छ । यसअघि सुदूरपश्चिम प्रदेशमा स्वाब राख्ने भाडो भीटीएमको अभाव हुँदा परीक्षण प्रभावित भएको थियो ।