काठमाडौं । लकडाउनको प्रभावका कारणले सवारी साधन चल्न नसकेपछि काठमाडौंमा अलपत्र परेका एक भारतीय मजदुर पैदल हिँडेर घर जान लाग्दा नागढुङ्गामा लुटिएका छन् । काठमाडौंमा मजदुरका रुपमा घर निर्माणमा संलग्न ४५ वर्षीय राघवेन्द्र चौधरी काठमाडौंबाट विराटनगर जाने क्रममा नागढुङ्गामा लुटिएका हुन् ।

नागढुङ्गाभन्दा तल बस पाइन्छ भन्ने आश्वासन दिएर निजलाई लुटिएको थियो । भारत, मालदह घर बताउने चौधरीलाई घाँटीमा खुकुरी तेस्र्याएर निजसँग रहेको १५ हजार रुपैयाँ र झोला लुटिएको बताइएको छ । ठेकेदारले घर जानलाई १५ हजार रुपैयाँ दिएका थिए । लुटिएपछि पैसाको अभावले पीडित चौधरी भोकै हेटौँडासम्म आइपुगेका थिए । बुद्धचोकमा भेटिएका उनलाई खाजा, पानी र बाटा खर्च दिँदै मकवानपुर प्रहरीलाई जिम्मा लगाइएको छ । उनी विराटनगर जान लागेका थिए ।

लकडाउन लम्बिँदै जाँदा दिनहुँ सैयौँ मजदूर हेटौँडा हुँदै आआफ्नो गन्तव्यमा जाँदै गरेको देखिन्छ । बाटामा खाजा र खाना नपाइएको कलैयाका रामपुकार ठाकुरले बताए ।