काठमाडौँ । कोरोना भाइरस (कोभिड १९) को सङ्क्रमणको जोखिमलाई मध्यनजर गर्दै राप्रपा गैरसरकारी संस्था समन्वय विभागले पार्टी अध्यक्ष कमल थापालाई मकवानपुर जिल्लाको लागि ज्वरो नाप्ने उपकरण (थर्मल गन) सहयोग गरेको छ।

विभागकी प्रमुख कुन्ती पोखरेलले अध्यक्ष थापालाई मङ्गलवार १० थान थर्मल गन हस्तान्तरण गरिएको हो।

कार्यक्रमलाई सम्बोधन गर्दै अध्यक्ष थापाले कोरोना भाइरस महामारीबाट बच्न धैर्यता,आत्मसंयम र अनुशासन आवश्यक रहेको बताएका छन् । थापाले पछिल्लो समयमा यस विषयमा विज्ञहरूको सुझाव सकारात्मक, उपयोगी र व्यवहारिक हुने भन्दै अब संक्रमितरप्रभावित क्षेत्रको वर्गीकरण गरेर जनजीवन र अर्थतन्त्रलाई क्रमशः सामान्य बनाउँदै लैजानुपर्नेमा जोड दिएका छन् ।

थोरै भए पनि यसरी स्वास्थ्य सामाग्री मकवानपुर जिल्लाको लागि उपलब्ध गराउन पाउँदा खुसी लागेको विभागकी प्रमुख पोखरेलले प्रतिक्रिया दिइन् ।

अध्यक्ष थापाले सामाग्रीहरू मकवानपुर जिल्लाका प्रमुख जिल्ला अधिकारी मार्फत बिपद व्यवस्थापन समिति कमाण्ड पोस्टमा हस्तान्तरण गर्न निर्देशन दिए ।

सो अवसरमा राप्रपा जनजाति विभागका नेता राम बहादुर थरकोले एक हजार मास्क समेत अध्यक्ष थापालाई हस्तान्तरण गरेका थिए । सहयोगको निमित्त अध्यक्ष थापाले विभागलाई धन्यवाद दिएका छन् ।

स्वास्थ्य सामाग्रीहरू तत्काल हेटौँडा पठाइने राप्रपा युवा नेता राजाराम बर्तौलाले जानकारी दिए । गैरसरकारी संस्था महासङ्ग र विभागले यस अघि पनि यस्ता सहयोगहरू निरन्तर गरिरहेको छ ।