धनगढी । सुदूरपश्चिम प्रदेशमा कोरोना आशंकामा अस्पतालमा भर्ना गरिएका एक सय १८ जना डिस्चार्ज भएका छन । उनीहरुमा कोरोनाको संक्रमण नदेखिएपछि आज डिस्चार्ज गरिएको हो । प्रदेशमा रहेका विभिन्न जिल्लामा अव्यवस्थित स्वास्थ्य संस्थामा स्थापना गरिएका आइसोलेसनबाट अहिले सम्म एक सय १८ जनालाई डिस्चार्ज गरिएको छ ।

उक्त प्रदेशमा डिस्चार्ज हुनेमा सबैभन्दा बढी सेती प्रादेशिक अस्पतालका बिरामी रहेका छन । अस्पतालबाट चार जना कोरोना संक्रमित सहित ४३ जना डिस्चार्ज भएका छन् । प्रदेशको स्वास्थ्य निर्देशनालयले दिएको जानकारी अनुसार अछामको बयलपाटा अस्पताल र डडेल्धुरा अस्पतालबाट १४÷१४ जना डिस्चार्ज भएका छन् । अछाम जिल्ला अस्पतालबाट ११, महाकाली अस्पतालबाट ८, डोटी जिल्ला अस्पतालबाट ६ जनालाई डिस्चार्ज गरिएको स्वास्थ्य निर्देशनालयले जनाएको छ । यस्तै बैतडी जिल्ला अस्पतालबाट र गोकुलेश्वर अस्पतालबाट ५÷५, बाजुरा अस्पतालबाट ४, कैलालीको भजनी प्राथमिक स्वास्थ्य केन्द्रबाट तीन, चौमाला प्राथमिक स्वास्थ्य केन्द्र, टिकापुर अस्पताल, दार्चुलाको गोकुलेश्वर अस्पतालबाट २÷२, बझाङ र बाजुराको कोल्टी प्राथमिक स्वास्थ्य केन्द्रबाट १÷१ जनालाई डिस्चार्ज गरिएको जनाइएको छ ।

प्रदेशका दुई अस्पतालमा हाल एक जना कोरोना संक्रमित र एक जना शंकास्पद गरी दुई जना व्यक्तिहरुलाई आइसोलेसनमा राखी उपचार भइरहेको निर्देशनालयले जनाएको छ । धनगढी उप–महानगरपालिका वडा नम्वर ५ की ३४ बषीय संक्रमित महिलाको सेती अस्पतालमा उपचार भईरहेको छ भने बाँकी एक जनाको चौमला स्वास्थ्य चौकीमा उपचार भईरहेको छ। संक्रमित र शंकास्पद सबैको रिपोर्ट नेगेटिभ आएपछि उनीहरुलाई डिस्चार्ज गरिएको हो । डिस्चार्ज हुनेहरुमा धनगढी उप–महानगरपालिका वडा नम्वर ५ का ३४ बर्षीय युवक, लम्कीका २१ बर्षीय युवक, लम्कीकै ६१ बर्षीय महिला र कञ्चनपुरको वेदकोटका ४१ बर्षीय पुरुष रहेका छन । स्वास्थ्य निर्देशनालयले सुदूरपश्चिम प्रदेशभरी एक सय ५४ बेडको आईसोलेसन वार्ड रहेको जानकारी दिएको छ ।