कास्की । पोखरामा एकजना मजदुरको हत्या गरिएको छ । शनिबार राति पोखरा महानगरपालिका– २० बिसाउनास्थित मजुवामा मजदुरको हत्या भएको हो ।

ओखलढुंगाको सुनकोशी गाउँपालिका–५ मुलखर्क घर भएका ती मजदुर पोखरामा ज्याला मजदुरीको काम गर्दै आएका थिए । मजदुरीमा काम गर्ने अन्दाजी ५५ वर्षका टंकबहादुर तामाङको गएराति हत्या भएको जिल्ला प्रहरी कार्यालय कास्कीका प्रहरी प्रमुख दानबहादुर कार्कीले जानकारी दिए ।

करीब एक महिनादेखि स्थानीय बाटोमा काम गर्दै आएका उनलाई उनकै भतिज इन्द्र तामाङ्ग लामाले हत्या गरेको हुनसक्ने आशंका गरिएको छ । हाल उनी फरार रहेका छन । मृतकको टाउकोमा गहिरो चोट देखिएको छ । शरीरभरि रगतका टाटा छन् । उनका आँखा समेत फुटेको बताईएको छ ।

प्रहरी उक्त घटनास्थलमा पुगेर घटनास्थलको मुचुल्का उठाइएको र शव पोस्टमार्टमका लागि पश्चिमाञ्चल क्षेत्रीय अस्पतालमा राखिएको प्रहरी प्रमुख कार्कीले जानकारी दिए । फरार रहेका उनका भतिजा तामाङलाई प्रहरीले खोजी गरिरहेको छ ।