काठमाडौँ। लकडाउनका कारण सरकारले आयल निगमबाट दैनिक २० करोड राजश्व घाटा व्यहोरिरहेको छ । यसबाट सरकारको राजश्व आम्दानीको लक्ष्य पुरा नहुने देखिन्छ ।

लकडाउनको कारण आवश्यक मात्रामा मोटरगाडीहरु रोकिएको कारणले गर्दा पेट्रोलियम पदार्थको खपत नहुँदा आयात पनि कम भएको र आयात कम हुँदा सरकारले राजश्वको रुपमा पाउने आम्दानी गुमाएको छ ।

सरकारलाई निगमले गत आर्थिक वर्षमा ५० अर्ब राजश्व तिरेको थियो तर अहिले भने निगमले त्यसको १ तिहाइ मात्र राजश्व सरकारलाई बुझाएको छ । निगमका अनुसार अप्रिल महिनामा निगमले १ अर्ब ४० करोडमात्र राजश्व तिरेको निगमले जनाएको छ ।

नेपाल आयल निगमका अनुसार चैत्र ११ गतेदेखि बैशाख १५ गतेसम्मको अवधिमा ९ हजार किलोलिटर पेट्रोल, ३७ हजार किलो लिटर डिजेल, ५३५ किलोलिटर हवाई इन्धन र ३५ हजार मेट्रिक टन एलपिजी ग्यास खपत भएको निगमले जनाएको छ ।