काठमाडौँ। कोरोनाका कारण नेपालको पर्यटन क्षेत्रमा ठूलो असर परेको हुनाले २० अर्बको प्याकेज नभई माथि उठ्न नसक्ने बताएका छन् । पर्यटन बोर्डका सिइयो धनन्जय रेग्मीले आज भएको भिडियो कन्भेक्समा उक्त कुरा बताएका हुन् ।

उनले सरकारले अब पर्यटन क्षेत्रमा लगानी गरेका व्यवसायीहरुका लागि १ वर्षसम्म ब्याजदर र किस्ता तिर्न नपर्ने र ३ वर्षसम्म किस्ता तिर्ने अवधि लम्ब्याउनु पर्ने धारण राखे ।

बोर्डले लकडाउन खुले लगत्तै यस क्षेत्रका बेरोजगार १८ सय कामदारहरुलाई रोजगारी दिने तयारी भएको जानकारी दिए । जसमध्ये १ हजार जनालाई युएनडीपीले र ८ सय जनालाई बोर्डले रोजगारी दिने उनले बताए ।

त्यसबाहेक अब आन्तरिक पर्यटन बढाउनु पर्ने अवस्था आएकाले सरकारले कर्मचारीलाई समेत तलबी बिदा दिनुपर्ने बताए । नेपालबाट विदेश जाने पर्यटकहरुलाई समेत अब आन्तरिक पर्यटनमा आकर्षित गर्नुपर्ने उनको भनाइ छ ।

उनले अहिलेसम्म पर्यटन क्षेत्रको विस्तृत तथ्यांक नभएकाले आगामी दिनमा विस्तृत तथ्यांक संकलन गर्ने समेत जानकारी दिए ।उनले कोरोनाले गर्दा पर्यटन क्षेत्रका १६ देखि २० लाख मानिसहरु प्रभावित भएको बताए ।