चीतवन । यति बेला देशमा कोरोना भाइरसको त्रास छ । विश्वभर फैलिएको यो महामारीले २ लाख मानिसको ज्यान लिइसकेको छ । औषधी अझै पत्ता लगाउन सकिएको छैन । विश्वका मै हुँ भन्ने शासकहरू आफ्नो नागरिकलाई यो महामारीबाट कसरी बचाउने भनेर चिन्तित छन् । अहिलेसम्म हामी भाग्यमानी छौँ की हामीले देशभित्र यो भाइरसबाट कसैलाई गुमाउनु परेको छैन । केही व्यक्तिमा देखिएको सङ्क्रमण पनि क्रमशः निको हुँदै गएको अवस्था छ । सरकारले समयमै लकडाउन गरिदिएको कारण हामीमाझ भाइरस सङ्क्रमण त्यति भयावह रूपमा फैलिन पाएन । यो एकदमै खुसीको कुरा हो ।

तर, दुःखको कुरा यही समयमा कोरोना भाइरस भन्दा ठुलो भाइरस हाम्रो राजनीतिमा पस्यो । यो भाइरसको उत्पत्ति बालुवाटारबाटै भएको देखियो । लक्षण देखिएको केही घण्टामै यसको सङ्क्रमण हिमाल,पहाड,तराई हुँदै प्रधानमन्त्री कार्यालय,ठुला साना राजनीतिक पार्टी,पूर्व मन्त्री,सांसद हुँदै पूर्व प्रहरी महानिरीक्षक सम्म पुग्यो । यसलाई पनि समयमै पहिचान गरी लकडाउन गर्न भ्याएका कारण सङ्क्रमणले उग्र रूप लिन भने पाएन । तर,राजनीतिक दल,नेता र जनतामा सन्त्रास अझै बाँकी छ । सत्ता र शक्तिको आडमा फैलाइएकोले यो भाइरसले अझै महामारी ल्याउने हो की भन्ने त्रास जनतामा बाँकी छ ।

त्यसैले प्रधानमन्त्री ज्यु तपाईँ त पछिल्लो समय भाइरस विज्ञ पनि हुनुभएको छ । कोरोनालाई त तातोपानीले धोयो भने फ्याटिए तत्त्व जान्छ भन्नुहुन्थ्यो यो तपाईंद्धारा नै उत्पत्ति गराइएको भनिएको भाइरसको उपचार कसरी सम्भव छ ? फेरी तपाईँ त्रिकालदर्शी बाबा पनि त हो । को अन्तिम प्रधानमन्त्री,कति वर्षमा रेल आउँछ,कति वर्षमा तेलको कुवा खनिन्छ र कुन पार्टी कहिले फुट्छ तपाईँ खरर भन्न सक्नुहुन्छ होइन ? तर अब त पक्कै तपाईँलाई ग्लानि भएको हुनुपर्छ यो भाइरसले सही ठाउँमा काम गर्न सकेन भन्ने कुरा बुझिहाल्नुभयो । झन्डै तपाईँलाई नै सङ्क्रमण गर्ने दाउमा थियो यो भाइरस समयमै अध्यादेश फिर्ता लिएर लकडाउन गर्नुभयो र मात्रै ।

प्रधानमन्त्री ज्यु किन होला तपाईँकै पालामा वाईडबडी,मार्सी भात,७० करोड,यती ग्रुप,ओम्नी ग्रुप, औषधी खरिद प्रकरण हुँदै अहिले त सिधै सांसद उठाउने सम्मको खेल भयो । यी सबै कुरामा तपाईँका प्रियपात्रहरू संलग्न छन् भन्ने कुरा छ्याङ्गै होइन अब त ह्वाङगै भइसक्यो । पछिल्लो घटनाक्रममा त बहालवाला सांसद र पूर्व प्रहरी महानिरीक्षककै संलग्नता देखियो त्यो पनि तपाईँसँगै डाइरेक्टर कनेक्सन जोडेर । औषधी लिन हिँडेका,खान नपाएर गाउँ हिँडेकालाई सिधै लौराले हान्ने तपाईँको प्रहरी प्रशासनले महेश बस्नेत,किसान श्रेष्ठ र सर्बेन्द्र खनाललाई भक्तपुरदेखि महोत्तरीसम्म किन रोक्न सकेन ?

तपाईँले भन्नुभएको होइन पोरोनाले संविधान बुझ्दैन यसले जसलाई पनि सङ्क्रमण फैलाउन सक्छ भनेर ? अनि महेश बस्नेत,किसान श्रेष्ठ र सर्बेन्द्र खनाललाई कोरोना सङ्क्रमण हुँदैन भन्ने ग्यारेन्टी कसरी गर्नुभयो र महोत्तरी पठाउनुभयो ? भक्तपुरदेखि महोत्तरीसम्म अनि महोत्तरीदेखि मेरियट होटेलसम्म चाहिँ कोरोना भाइरस मुक्त कसरी हुन सक्यो ? तपाईँकै सल्लाहमा पटक पटक टेलिफोन सम्पर्क हुँदै रातारात हिँडेका बिचरा हाम्रा माननीय र देशको सुरक्षा निकायको उच्च तहमा पुगिसकेको व्यक्तिलाई यदि केही भइदिएको भए तपाईँसँग के जवाफ थियो ? सुनिन्छ तपाईँले हतार हतार ल्याएको अध्यादेशको आडमा केही राजनीतिक दल फुटाएर अझै शक्तिशाली बन्ने लोभ र लालसाका कारण यो स्थिति सृजना भयो । यदि यो साँचो हो भने तपाईँ देशको अभिभावक भएर यस्तो गैर जिम्मेवार बन्न मिल्छ त प्रधानमन्त्री ज्यु ?

यो काममा खटिने माननीय ज्युले अझै शानका साथ दैनिक दर्जन बढी मिडियामा भन्दै हुनुहुन्छ म गएको हो,म सँगै किसान श्रेष्ठ र सर्बेन्द्र खनाल गएकै हो, डा.सुरेन्द्र यादवलाई राती ३ बजे काठमाण्डौं ल्याएकै हो । प्रधानमन्त्रीलाई भेटाउन बालुवाटार लैजाने तयारी गरेकै हो, अझै केही सांसद भूमिगत छन् र मेरो सम्पर्कमा हुनुहुन्छ, नम्बर चाहिने भए म दिन्छु जस्ता कुरा गर्दै हुनुहुन्छ । यो सबै कुरा तपाईँलाई जानकारी छ वा तपाईँकै निर्देशनमा भइरहेको छ नि हैन त प्रधानमन्त्रीज्यू ? यदि हो भने जनतालाई भनिदिनुस् यो कस्तो लोकतन्त्र हो प्रधानमन्त्रीज्यू ?

लकडाउनका कारण ३ करोड जनताले दुःख पाएका छन् । लाखौँ जनता भोकै छन् । अनि तपाईँ देशको अभिभावक भएर अर्को पार्टीका ५÷७ जना सांसदले दुःख पाएछन् (त्यो पनि मन्त्री र उपसभामुख हुन नपाएर) भन्दै बालुवाटार भित्राएर के तमासा देखाउन खोज्नुभएको ? किन यति धेरै पिर चिन्ता गर्नुहुन्छ रेणु यादव वा ईस्तियाक राईनको ? तीन करोड नेपालीसँग भएको भन्दा छुट्टै के सम्बन्ध छ तपाईँको ईस्तियाक र यादवहरूसँग ? तपाईँले २ वर्ष अगाडी बोलेका रेल,तेल,ग्याँस पाइप त जनताले मागेका छैनन् नि अनि किन शान्तिसँग बाँच्न दिनुहुन्न जनतालाई ? आफ्ना जनताको न्यूनतम अधिकार गाँस,बास र कपासको व्यवस्था गर्न नसक्ने,महिला,दलित,जनजाति,मधेसी र अल्पसङ्ख्यकमा पारिएकाहरूको हितमा केही गर्न नसक्ने अनि माफिया,दलाल र कालोबजारी गर्नेलाई केही गर्न नसक्ने तपाईँ जनतालाई भोको पेट शान्तिसँग बाँच्न पनि नदिने ? यही हो तपाईँको सुखी नेपाली,सम्बृद्ध नेपाल ?

तपाईँका सल्लाहकार र भित्रियाहरुको कारण बालुवाटार भन्दा बाहिर तपाईँकै पार्टीका नेता र कार्यकर्ता रोइकराई गरिरहेका छन् । भीम रावल,रामकुमारी झाँक्री जस्ता नेतालाई तपाईँका प्रियपात्रहरूले पद नपाएर कराएको भनेर अपमान गरिरहेका छन् । तपाईँलाई थाहा छ की छैन कुन्नी बाहिर मेडिकल माफियाहरू,कर छली गर्ने,कालोबजारी गर्ने,सरकारको संरक्षणमा कृत्रिम अभाव सृजना गरी कमाउनेहरूले देशमा कोरोना भन्दा भयावह आतङ्क मच्चाइसकेका छन् । सडकमा खान नपाउने मजदुर र विद्यार्थीलाई चामल बाँडेको आरोपमा तपार्इंका सिडिओ र प्रहरीले ज्ञानेन्द्र शाहीलाई समातेर थुनेको छ, त्रिभुवन विश्वविद्यालयका विद्यार्थी भोकै हुँदा चामल बाँड्ने हेमराज थापालाई त्यहाँको मेयर र प्रशासनले लखेटेको छ । एकातिर लकडाउनले भोकै परेकालाई राहत बाँड्दा तपाईँका मान्छेले नै दुःख दिने अर्कोतिर तपाईँकै प्रियपात्रहरूले मन्त्री र पैसा दिन्छु भन्दै सांसद उठाउने खनी तपाईँ अभिभावक भएर यी सबै कुरा पत्तो नपाउने ? यो भन्दा लाजमर्दो कुरा अरू के हुन सक्छ प्रधानमन्त्रीज्यू ?

आजको महामारीमा तपाईँले त हिजो भूकम्पले घर भत्केकाहरूले घर बनाउन सकेका छैनन् वर्षा लागिसक्यो । पाँच वर्षसम्म हुरी बतास,चट्याङ,झरी सहेर बसेका गरिब,निमुखा,भोका,जनताको दैनिकी कसरी चलेको छ ? यिनका बालबच्चा कसरी पालिएका छन् ? बर्षौंदेखि रोग पालेर बस्न बाध्य ती वृद्ध बाबुआमाले औषधी पाएका छन् की छैनन्, यसबारेमा पो चासो राख्ने होइन र ? कसको सांसद बिकाऊ छन् ? कुन पार्टीमा किचलो छ ? कुन भ्रष्टलाई संरक्षण चाहिएको छ ? भनेर हिँड्न मिल्छ र प्रधानमन्त्रीज्यू ? आजका दिनसम्म त समृद्धिको यात्रामा निस्केको दुई तिहाइको सरकारको नेतृत्व गर्न पाउनु भएको छ प्रधानमन्त्री ज्यु भोलि के हुन्छ भन्न सकिन्न त्यसैले अलिकति लाज मान्ने बेला भयो की ?