काठमाडौं । प्रधानमन्त्री केपी शर्मा ओली पार्टी अध्यक्ष पुष्पकमल दाहाल प्रचण्डबीच बालुवाटारमा भेटवार्ता भएको छ ।

पार्टीभित्रको आन्तरिक विवाद टुग्याएर मिलेर जाने प्रस्ताव राख्‍नका लागि ओलीले दाहाललाई बालुवाटार बोलाएका हुन् । प्रधानमन्त्री निवास बालुवाटारमा दुई अध्यक्ष बीच भेटवार्ता जारी रहेको प्रधानमन्त्रीका प्रेस सल्लाहकार सूर्य थापाले जानकारी दिए। ‘दुई अध्यक्षबीच अहिले भेटवार्ता चलिरहेको छ’ उनले भने, ‘समसामयिक विषयमा छलफल भइरहेको हो।’

सोमबार विभिन्न समूहको छलफलपश्चात मंगलबार सचिवालय बैठक बोलाउने सहमति भएको थियो । आज सचिवालय बैठक बस्ने नबस्ने अन्योल रहेको छ।

पार्टीका अर्का अध्यक्ष पुष्पकमल दाहालसँग चर्किएको अन्तर्विरोधले ओलीलाई रक्षात्मक स्थितिमा पुर्‍याएको छ। पार्टीभित्र छलफल नगरी छले अध्यादेश ल्याउनेसम्मका काम गरेपछि अन्य नेता पनि ओलीको कार्यशैलीविरुद्ध प्रस्तुत भएका छन्।