कैलाली । कैलालीमा एकजना गर्भवती महिला मृत अवस्थामा फेला परेकी छन । घोडाघोडी नगरपालिका – ५ घर भएकी ३० वर्षीया तुलसी घर्ती क्षेत्री चौधरी मृत अवस्थामा फेला परेकी हुन । उनको मृत्यु नभइ हत्या गरिएको माइती पक्षले दावी गरेका छन ।

वैशाख १ गते राति श्रीमान् लालबहादुर चौधरीसहित जेठानी जेनिषा चौधरीबीच तुलसीको विवाद भएको र सोही विवादपछि तुलसीमाथि आक्रमण गरिएको उनका दाइ दिलबहादुर घर्तीक्षेत्रीले बताए । सोही राति उनी मृत अवस्थामा फेला परेकी थिइन् । उनको मृत्यु भएको आज १३ दिन बितिसक्दापनि घटनाको छानबिन नभएको उनका दाइले जानकारी दिए । ‘उनको पहिलो सन्तानको मृत्यु भएको थियो भने दोश्रो सन्तानका रुपमा छोरा छन्’ उनले भने, ‘श्रीमानको असहयोगले उनी आजित बनेकी थिइन् । त्यसैमा उनीमाथि गम्भीर आरोप लगाइयो गर्भमा हुर्किरहेको तेश्रो सन्तान आफ्नो होइन् भनेर ।’ मृतक ८ महिनाकी गर्भवती थिइन् ।

तर आत्महत्या दुरुत्साहनको मुद्दा चलाएर मृतकका श्रीमान् लालबहादुर चौधरीलाई पक्राउ गरिसकेको कैलालीका प्रहरी नायव उपरीक्षक दक्षकुमार बस्नेतले बताए । पोष्टमार्टम रिपोर्ट आएपछि थप अनुसन्धान गरिने पनि उनले जानकारी दिए ।