भरुवा बन्दुक र मृगको मासुसहित दुई पक्राउ

सिन्धुपाल्चोक । जिल्लाको त्रिपुरासुन्दरी गाउँपालिकाका २ जनालाई प्रहरीले भरुवा बन्दुक र मृगको मासुसहित पक्राउ गरेको छ । शनिबार पक्राउ गरिएका सोही गाउँपालिका–२ का उनीहरुलाई बाह्रबिसे इलाका प्रहरी कार्यालयले पक्राउ गरेको हो ।
जिल्ला प्रहरी कार्यालयका अनुसार ३९ वर्षीय हीराबहादुर गुरुङ र ३४ वर्षीय टपीन्द्रबहादुर गुरुङलाई घरेलु हतियारसहित पक्राउ गरिएको थियो ।
जङ्गली जनावरको हत्या गरेको जानकारी पाउनासाथ इलाका प्रहरी कार्यालय बाह्रबिसेबाट गएको प्रहरी टोलीले तत्काल पक्राउ गरेको जिल्ला प्रहरी कार्यालयका सूचना अधिकारी प्रहरी नायब उपरीक्षक माधव काफ्लेले जानकारी दिए ।
उनका अनुसार खानतलासी गर्दा टपीन्द्रको भान्साघरमा मृगको मासु र पेरुङ्गो बाटामा राखिएको अवस्थामा फेला परेको थियो । त्यसैगरी गुरुङको घरको पूजाघरमा २ नाल भरुवा बन्दुकसमेत फेला परेको प्रहरीले जनाएको छ ।
उनीहरुलाई रीतपूर्वक पक्राउ गरी आवश्यक अनुसन्धानका लागि इप्रका बाह्रबिसेको हिरासतमा राखी थप अनुसन्धान कार्य भइरहेको प्रहरी नायब निरीक्षक काफ्लेले जानकारी दिए । रासस
प्रतिक्रिया दिनुहोस्