नगरप्रमुख घर्तीमाथि मुक्का प्रहार

जाजरकोट । जिल्लाको भेरी नगरपालिकाका प्रमुख चन्द्रप्रकाश घर्तीमाथि मुक्का प्रहार भएको छ । नेकपाका नेता तथा नगरप्रमुख घर्तीलाई राष्ट्रिय युवा संघ नेपालका जिल्ला संयोजक दिपेन्द्र शाही सहितको समुहले शनिबार मुक्का प्रहार गरेको नेकपा जाजरकोटले बताएको छ । उक्त युवा संघ नेकपाकै मातहतको हो ।
भेरी नगरपालिका १० मा रहेको फेराखोलाको भेरी किनारमा उक्त समूहले घर्तीमाथि हमला गरेको नेकपा जाजरकोटले जानकारी दिएको छ । नेकपाका कार्यकर्ता तथा साविकको पुन्मा गाविसका अध्यक्ष मधु चन्दको मृत्यु भएपछि मलामी गएका घर्तीमाथि उक्त समूहले सांघातिक हमला गरेको हो । मुक्का प्रहारबाट उनको आँखा र मुखमा चोट लागेको छ ।
शाही युवा संघ जाजरकोटका पूर्व अध्यक्ष हुन । गाउँमा योजना पार्दा घर्तीले पक्षपातपूर्ण व्यवहार गरेको शाहीले आरोप लगाउदै आएका थिए । उक्त समूहको खोजी कार्य जारी रहेको जाजरकोट प्रहरीले बताएको छ ।
प्रतिक्रिया दिनुहोस्