काठमाडौं । अघिल्लो मन्त्रिपरिषद्ले गरेको निर्णयमा चौतर्फी दबाब भएपछि प्रधानमन्त्री केपी शर्मा ओलीले मन्त्रिपरिषद् बैठक बोलाएका छन । प्रधानमन्त्री निवास बालुवाटार बिहान ११ बजेदेखि बैठक सुरु भएको छ ।

गत सोमबार बसेको मन्त्रिपरिषद् बैठकले राजनीतिक दलसम्बन्धी र संवैधानिक परिषद्को काम, कर्तव्य र अधिकारसम्बन्धी अध्यादेश पारित गरेर राष्ट्रपतिबाट जारी भएसँगै दुवै अध्यादेश फिर्ता लिन चौतर्फी दबाब सिर्जना भएको थियो ।

राष्ट्रिय संकटको घडीमा सरकारले ल्याएका यी दुइ अध्यादेशको विरोध यत्रतत्र भएको थियो । त्यति मात्रै होइन नेकपा भित्रकै सांसदको पनि यसमा आपत्ति थियो । आजको बैठकमा जारी भइसकेका २ अध्यादेश फिर्ता लिने विषय र लकडाउनका विषयमा छलफल हुने बताइएको छ ।

पछिल्लो पटक थपिएको लकडाउनको अवधि १५ वैशाखमा सकिदै छ । यस विषयमा अब लकडाउन हटाउने या यथावत राख्ने या यथावत भएपनि खुकुलो बनाउने भन्ने विषय छलफल गरिने बताइएको छ ।