काठमाडौं । पत्रकार तथा उपन्यासकार पिटर जे कार्थकको ७७ वर्षको उमेरमा निधन भएको छ । क्यान्सर रोगको आशंकामा उनी ललितपुरको हरिसिद्धिस्थित नेपाल क्यान्सर अस्पतालमा उपचार उपचाररत थिए ।

रोगको पु्ष्टि नहुँदै पिटरको हृदयाघातका कारण बुधबार बिहान साढे पाँच बजे निधन भएको उनको पारिवारिक स्रोतले जनाएको छ ।

केही दिनअघि उनी कुपण्डोलस्थित घर फिर्ता भएपनि मंगलबार थप उपचारका लागि अस्पताल पुर्‍याइएको थियो ।

‘प्रत्येक ठाउँ प्रत्येक ठाउँ’ उपन्यासका लागि साझा पुरस्कार विजेता पिटर नेपाली र अंग्रेजी दुवै भाषामा पोख्त थिए । हिमालयन टाइम्स, काठमाडौँ पोस्ट र रिपब्लिकालगायत अंग्रेजी दैनिकहरुमा उनले लामो समय कपि एडिटरका रुपमा काम गरेका थिए ।
दार्जिलिङमा जन्मिएका उनी विगतदेखि नै नेपालमा बस्दै आएका थिए ।