बारा । राहतको नाममा कुहिएको दाल विक्री गरेको आरोपमा कलैया उपमहानगरपालिका प्रमुख राजेश राय यादव पक्राउ परेका छन् । वडाध्यक्षहरूलाई ४ वर्ष पुरानो दाल बेचेको पाइएपछि मंगलवार दिउँसो रायलाई पक्राउ गरिएको जिल्ला प्रहरी कार्यालय बाराका प्रहरी प्रवक्ता प्रहरी नायव उपरीक्षक गौतम मिश्रले जानकारी दिएका छन् । यो घटनामा संलग्न आठजना यसअघि नै पक्राउ परिसकेको खबर आजको आर्थिक अभियान दैनिकमा प्रकाशित छ ।

यसअघि कलैया–१ का वडाध्यक्ष हरिओम साह, वडा नं ७ का अध्यक्ष सर्फुल्लाह अन्सारी, वडा नं २० का सचिव खेदु मियाँसँगै वडा नं ७ स्थित यादव आइस एन्ड कोल्डस्टोरका कर्मचारी कृष्णप्रसाद यादव र वीरगन्जस्थित धनलक्ष्मी दाल मिलका सञ्चालक तेजकरण जैनलाई नियन्त्रणमा लिइएको थियो ।

त्यस्तै सोमवार वडा नं ११ का अध्यक्ष सर्वनारायण चौधरी, वडा नं १३ का अध्यक्ष राजनप्रसाद कुर्मी र वडा नं २६ का अध्यक्ष महेश साहलाई पनि पक्राउ गरिएको थियो । कलैया–७ मा रहेको यादव आइस एन्ड कोल्डस्टोरमा ४ वर्षदेखि भण्डारण गरी राखिएको रहरको दाल खरीदविक्रीमा संलग्न रहेको अभियोगमा हिरासतमा राखेर उनीहरूको बयान शुरू गरिएको प्रहरी नायव उपरीक्षक मिश्रले जानकारी दिए ।

कुहिएको दाल विक्री गरेको पाइएपछि स्थानीय प्रशासनले कलैया उपमहानगरपालिका–७ स्थित यादव चिस्यान गोदाम (कोल्ड स्टोर)मा दुईपटक अनुगमन गरेको थियो । सोमवार कोल्डस्टोरमा दोस्रोपटकको अनुगमनमा २२ हजार ५०० किलो रहरको दाल बरामद गरी शिल गरिएको छ । त्यसअघि शनिवार २५ किलोको ३२० बोरा शिल गरिसकिएको थियो । कांग्रेसका नेता तथा पूर्वसांसद राधेचन्द्र यादवको नाममा रहेको यो गोदाम कलैया उपमहानगरपालिकाका प्रमुख यादवले सञ्चालन गर्दै आएका छन् ।

प्रमुख जिल्ला अधिकारीको आदेशमा कोल्डस्टोरसहित वडाहरूमा बाँडिएको दाल प्रहरीले बरामद गरी परीक्षणका लागि खाद्य प्रविधि तथा गुण नियन्त्रण कार्यालयमा पठाएको थियो । कार्यालयले जिल्ला प्रहरी कार्यालयलाई पत्र पठाएर गुणस्तरहीन भएको जानकारी गराएको छ ।  उक्त दाल आधा दर्जन वडाका सयौं परिवारलाई दाल राहतमा
बाँडिएको थियो ।

कुहिएको दाल विक्रीवितरण प्रकरणमा उपमहानगर प्रमुख, वडाध्यक्ष र व्यवसायीले आफ्नो संलग्नता अस्वीकार गरेका छन् । कसुर प्रमाणित भएमा २ लाख जरीवाना र १ वर्ष कैद वा दुवै हुन सक्ने कानूनी व्यवस्था छ ।