काठमाडौँ । लकडाउनको समयमा जनतालाई घर भित्र थुनेर सरकारले आफ्नो निकटमा रहेकाहरूलाई विभिन्न पदमा नियुक्ति गरेको भन्दै राप्रपा नेतृ कुन्ती पोखरेलले खेद प्रकट गरेकी छिन् ।

बिहीबार सरकारले भूमिसम्बन्धी समस्या समाधान आयोग (सुकुम्वासी) आयोग गठन गरेपछि नेकपा भित्रै पनि यसको विरोध सुरु भएको छ ।

राप्रपा नेतृ पोखरेलले राज्य महामारीको अवस्थाबाट गुज्रिरहेकाले सरकारे हाल जनताको स्वास्थ्यलाई पहिलो प्राथमिकतामा राखेर कार्य गर्नुपर्नेमा जोड दिएकी छिन् । उनले भनिन ‘सरकारले यो अवस्थामा कसैले विरोध गर्दैन भनेर आफ्ना निकटका मानिसहरूलाई अनेक बहानामा नियुक्ति गरेकोमा म खेद प्रकट गर्छु । जनता घर भित्र छ हामीले जे गरे पनि हुन्छ । यसको विरोध हुँदैन भनेर यो विषम परिस्थितिको गलत प्रयोग गर्न सरकारलाई छुट छैन ।’

सरकाले जनताप्रतिको आफ्नो उत्तरदायित्वबाट पन्छिँदै संसार नै गम्भीर अवस्थामा रहेका बेला गलत कदम चालेको नेतृ पोखरेलको भनाई छ । उनले भनिन ‘जनताको स्वास्थ्यलाई सरकारले पहिलो प्राथमिकतामा राख्नुपर्छ । यसबाट पन्छिए अनेक समिति गठन गर्न यो समय उचित छैन ।’

उनले थपिन ‘मलै यस अघि नै सरकार माथि औला उठाउने समय हैन भनेर पटक पटक भनेकी छु । तर सरकारले आम जनमानसको स्वास्थ्यलाई प्राथमिकतामा राखेर काम गर्ने पर्छ अनि मात्र सरकारको माथि प्रश्न उठ्ने छैन ।’

नेतृ पोखरेलले हालको सरकार बहुमतको सरकार भएको र बहुमतको सरकारले सरल परिस्थितिमा पनि सहज तरिकाले उक्त कामहरू गर्न सक्ने बताउँदै अहिले नै यो कदम उठाउन कतिको उचित रहेको भन्दै सरकार माथि प्रश्न समेत गरेकी छिन् ।

हाल देशभरका जनतालाई बन्धनमा राखेर सरकारले महामारीलाई नजरअन्दाज गर्दै आफ्ना निकटका मानिसलाई जागिर खुवाउने मेसो गरेको भन्दै यसको चौतर्फी विरोध सुरु भएको छ । प्रतिपक्ष लगायतका पार्टीहरूले समेत यसको घोर भर्त्सना गर्दै विज्ञप्ति समेत जारी गरिसकेका छन् ।