काठमाडौँ । कोरोना भाइरस (कोभिड–१९ )को सङ्क्रमण फैलिएसँगै ललितपुर जावलाखेलमा रहेको सदर चिडियाखाना गत चैत ५ गतेदेखि नै अनिश्चितकालका लागि बन्द गरिएको चिडियाखानाका सूचना अधिकारी लिना चालिसेले बताइन ।

चिडियाखाना भिडभाड हुने ठाउँ भएको र सरकारको सूचना पालना गरेर लकडाउन हुनु भन्दा पहिला नै बन्द गरेको चालिसेले बताइन । कोरोनाले अन्य क्षेत्रमा असर गरेको जस्तै चिडियाखानामा पनि असर गरेको छ । अरू महिना भन्दा चैत वैशाखमा महिनामा चिडियाखाना घुम्न आउने मानिसको सङ्ख्या वृद्धि हुने गर्थ्यो । उक्त महिनामा स्कुल बिदा हुँदा बच्चाहरूको घुम्ने र घुमाउने मुख्य केन्द्र चिडियाखाना हुने गरेको छ । मानिसको सङ्ख्या वृद्धि भए सँगै आम्दानीको स्रोत पनि बढ्थ्र्यो कोरोनाले गर्दा सबै तिर ठप्प छ चालिसेले भनिन ।

कोरोना लाग्दा पनि जनावरको उस्तै हेरचाह

कोरोना लाग्दा पनि चिडियाखानामा जनावरप्रति गर्ने हेरचाहमा कुनै परिवर्तन नभएको चालिसेले बताइन । उनले भनिन् ‘बाघमा पनि स्वास्थ्यमा झन् ख्याल राखेर काम गरिरहेका छौ । जनावरको खोरहरूमा नियमित चुन, औषधी छरेर सरसफाइ गरिरहेका छौ’।
चिडियाखानामा जनावरको हेरचाह गर्ने कर्मचारी नियमित आउने गरेका छन् भने कतिपय कर्मचारी चिडियाखानामा नै बसेर हेरचाह गरिरहेका छन् । चिडियाखानामा ७५ जना कर्मचारी रहेको मध्ये हाल २५ जना कर्मचारीले उक्त स्थानको हेरचाह गरिरहेका छन् । भने १९ जना कर्मचारी चिडियाखानामा नै बस्ने गरेका छन् । हाल चिडियाखानामा कर्मचारीको हेरचाह र डाक्टर ल्याएर नियमित चेकजाच गराउने भएको कारणले गर्दा जनावरको स्वास्थ्यमा कुनै असर देखा नपरेको चालिसेको भनाइ छ ।

चिडियाखानामा ३ महिनालाई पुग्ने खानेकुरा जो सदर चिडियाखानामा ३ महिनालाई पुग्ने खानेकुरा बाँकी रहेको चालिसेले बताइन । नेपालमा कोरोना आयो भन्ने खबर थाहा पाएपछि अब खाद्यान्न र मासु अभाव हुन्छ कि भन्ने डरले ३ महिनासम्मको लागि पुग्ने खानेकुराको जो गरेको सूचना अधिकारी चालिसेले जानकारी दिइन । उनले भनिन ‘चिडियाखानामा काम गर्ने ठेकेदारहरूले जनावरको आवश्यकता अनुसारको खानेकुराहरू स्टक राख्नु भएको छ । आवश्यक परेपछि ल्याइदिनु हुन्छ । हामीले अफिसमा चाहिँ एक हप्तालाई पुग्ने खानेकुरा मात्र राख्ने गरेका छौ’ ।

गत चैत, वैशाखमा कतिले गरे अवलोकन ?

२०७५ सालको चैत्र महिनाको तथ्याङ्क हेर्दा चिडियाखाना अवलोकन १ लाख २१ हजार १०३ जनाले गरेका छन् थिए भने त्यसबाट ३ करोड १६ लाख ३३ हजार ५ सय ७५ रुपैयाँ राजस्व उठेको थियो । त्यसै गरी २०७६ साल वैशाख महिनामा १ लाख २६ हजार ४ सय ३२ जनाले अवलोकन गरेका थिए भने २ करोड ९८ लाख ८७ हजार ३ सय रुपैयाँ राजस्व उठेको चालिसेले बताइन् ।
२०७६ चैत महिनामा ७ हजार ३३६ जनाले अवलोकन गरेका थिए भने १३ लाख ७३ हजार ६१० राजस्व उठेको चिडियाखानाको तथ्याङ्कले देखाएको छ ।

चैत महिनामा ३ हजार देखि १० हजार पर्यटकले चिडियाखाना अवलोकन गर्ने गरेको चालिसेले बताइन । चिडियाखानामा आन्तरिक र बाह्य गरेर वैशाख १ गते मात्र २५ देखि ३० हजारसम्म पर्यटक आउने गरेका थिए ।