धनगढी । कैलालीमा फेरि अर्की एक किशोरी सामूहिक बलात्कारमा परेकी छन् ।

कैलालीको भजनी नगरपालिकामा एक १५ वर्षीया किशोरीलाई सामूहिक बलात्कार गरेको आरोपमा वडासचिवसहित तीन जना पक्राउ परेका छन् ।

किशोरीलाई सामूहिक बलात्कार आरोपमा जोशीपुर गाउँपालिका वडा नम्बर ४ का सचिव २९ वर्षीय रामकुमार चौधरीसहित तीन जनालाई प्रहरीले भजनीबाट पक्राउ गरेको हो ।

बलात्कार आरोपमा सचिव चौधरीसहित ३१ वर्षीय सुरेशकुमार चौधरी र २२ वर्षीय मंगल चौधरी पक्राउ परेको कैलालीका प्रहरी नायव उपरीक्षक दक्षकुमार बस्नेतले जानकारी दिए ।

उनीहरुले किशोरीलाई विभिन्न प्रलोभन देखाएर भजनी बजार जाउँ भन्दै भजनीको वडा नम्बर ८ कृष्णनगरस्थित हुलाकी सडकको दक्षिणतर्फको झाडीमा लिई डर, धम्की देखाएर बलात्कार गरेको प्रहरी नायव उपरीक्षक बस्नेतले बताए । उनीहरुमाथि कैलाली जिल्ला अदालतबाट १५ दिनको म्याद थप भई अनुसन्धान अगाडि बढाइएको प्रहरीले जनाएको छ ।