काठमाडौं । कोरोना भाइरासको त्रास बढेसंगै सरकारले गरेको लक डाउनका कारण समस्यामा परेका आफ्नो नगरपालीकाको बासिन्दाको विद्युत् महसुल कर्जन्हा नगरपालिकाले तिर्ने भएको छ ।

नगरपालिका कार्यपालिकाको बैठकले कोभिड–१९ को सङ्क्रमण फैलन नदिन गरिएको लकडाउनका कारण मारमा परेका नागरिकले दुई महिनामा उपभोग गर्ने घर मिटरको विद्युत् महसुल नगरपालिकाले तिर्ने निर्णय गरेको छ ।

यस्तै बैठकले स्वास्थ्यकर्मी तथा कर्मचारीहरु नियमित रुपमा काम गर्नका लागि रु २० लाखको स्वास्थ्य बीमा गर्ने निर्णयसमेत गरेको नगरप्रमुखले जनाएका छन् ।

त्यस्तै नगरपालिकाले विभिन्न वडाका अति विपन्न, दलित दुई हजार परिवारलाई परिवार सङ्ख्याको अनुपातमा र चार जनासम्मको परिवारलाई प्रतिपरिवार २० किलो चामल, तीन किलो आलु, दुई किलो दाल, एक लिटर तेल र आधा केजी स्वाबिन तथा चार जनाभन्दा बढी परिवार सङ्ख्या भएकालाई त्यही अनुसार राहत बितरण गरिएको नगरप्रमुख गङ्गा पासवानको भनाइ छ ।