क्यानाडानेपाल बाट

कोरोनाबाट हालसम्म विश्वभर १४ नेपालीको मृत्यु भएको छ ।

गैरआवासीय नेपाली संघका अध्यक्ष कुमार पन्तको अध्यक्षतामा गठित उच्चस्तरिय समितिअन्तर्गतको स्वास्थ्य समितिले संकलन गरेको आँकडाअनुसार कोरोना भाइरसका कारण १४ नेपालीको मृत्यु भएको रेकर्ड फेला परेको हो।

युरोप, अमेरिका, अष्ट्रेलिया, मलेसिया र खाडी मुलुकमा गरी हालसम्म कम्तिमा ६ सय नेपालीमा कोरोना संक्रमण भएको अनुमान गरिएको छ। वेलायतमा ८, अमेरिकामा ५, युएईमा एकजना नेपालीको मृत्यु भएको एनआरएनएले जनाएको छ ।

बेलायतमा सबैभन्दा बढी आठ नेपालीको मृत्यु भएको छ । मृत्यु हुनेमा चितवनका ४० वर्षीय प्रशान्त अर्याल, पर्वतका ५९ वर्षीय चेतप्रसाद गुरुङ, सोलुखुम्बुका ५८ वर्षीय शिव श्रेष्ठ, पर्वतका ५६ वर्षीय भूतपूर्व गोर्खा सैनिक मेखबहादुर गुरुङ र संखुवासभाका ६६ वर्षीय लिलाबहादुर राई छन् ।

कोरोना संक्रमणका कारण अमेरिकामा ५ नेपालीको मृत्यु भएको छ। मृत्यु हुनेमा पाँचथर घर भएका ५० वर्षीय अनिल लिम्बु, सोलुखुम्बुका ४३ वर्षीय ङिमा तेम्बा शर्पा र मुस्ताङका ४८ वर्षीय थोंग्वेन विष्ट रहेका छन्। ४० वर्षीय सोनाम लामाको कोरोनाका कारण मृत्यु भए–नभएको पुष्टि भएको छैन।

उनलाई उपचारपछि अस्पतालले घरमै बसेर आराम गर्न भनेको थियो ।कोरोना संक्रमणबाट संयुक्त अरब इमिरेट्स (युएई) मा एक नेपाली महिलाको मृत्यु भएको छ । रुपन्देहीको देवदह खैरेनीकी ४० वर्षीया बिनु पराजुलीको संक्रमणका कारण मृत्यु भएको युएईस्थित नेपाली दूतावासले जानकारी दिएको छ ।

विश्वमा छरिएर रहेका सयौं नेपाली कोरोना संक्रमित भए पनि धेरैजना निको भएर अस्पतालबाट घर फर्किसकेका छन् ।

नेपालमा भने अहिलेसम्म नौजना नेपालीलाई कोरोना संक्रमण भएको र एकजना निको भइसकेका छन् ।
शनिबार पर्सामा तीनजना कोरोना संक्रमित देखिएका छन् । ती भने नेपाली नभई भारतीय नागरिक हुन् । योसँगै नेपालमा कोरोना संक्रमितको संख्या १२ पुगेको छ ।