काठमाडौँ । नेपाल आयल निगमले आइतबारदेखि बजारमा १४.२ किलोको भरी सिलिण्डर ग्यास पठाइएको जानकारी दिएको छ।

संघका अध्यक्ष गोकुल भण्डारीले सबै ग्यास उद्योगले आ-आफ्ना डिलरमार्फत् बजारमा भरी सिलिण्डर ग्यास पठाएको बताए । ‘लकडाउनको अवधिमा पनि विभिन्‍न नाका हुँदै दिनहु ग्यासका बुलेटहरु नेपाल प्रवेश गरेका छन् । हामीसँग पर्याप्त मात्रामा ग्यास मौजदात रहाँदा भण्डारगृह नै भरिएका छन्,’ उनले भने। देशभरका ५९ वटा ग्यास उद्योगमा करिब १० हजार मेट्रिकटन क्षमता रहेकोमा हालः सबैको भण्डारगृह भरिएर लोड भएका एक सय वटा बुलेटमा ग्यास राखिदै आएको उनले जानकारी दिए।

नेपाल एलपी ग्यास उद्योग संघले आम उपभोक्तालाई आफूसँग रहेको खाली सिलिण्डर डिलरमा बुझाउनसमेत आग्रह गरेको छ। निगमका प्रवक्ता विनितमणि उपाध्यायका अनुसार विभिन्न नाकाबाट पर्याप्त मात्रामा ग्यासका बुलेट भित्रिरहेका छन् भने आजमात्र काठमाडौं उपत्यकामा ३५ देखि ४० हजार भरी ग्यास सिलिण्डर पठाइसकिएको छ।

गत बुधबार बसेको निगम सञ्चालक समितिको बैठकले बिहीबारदेखि भरी सिलिण्डर ग्यास पठाउन दिर्नेशन दिएको थियो। बजारमा खाना पकाउने ग्यासको माग उच्च भएपछि निगमले चैत १२ गते बेलुकी आधा सिलिण्डर ग्यास बिक्री वितरण गर्ने निर्णय गरेको थियो। चैत १६ गतेदेखि मुलुकभरि आधा सिलिण्डर ग्यास बिक्री भएको थियो।